బెంగుళూరు: ఐటీ సేవల దిగ్గజం ఇన్పోసిస్ టెక్నాలజీస్ 32వ వార్షిక సాధారణ సమావేశం ఈరోజు బెంగుళూరులో జరగనుంది. ఇన్పోసిస్ కంపెనీని స్దాపించిన వ్యవస్దాపకుల్లో ఒకరైన నారాయణ మూర్తి రిటైర్మెంట్ తీసుకోగా తిరిగి మళ్లీ 22 నెలలు తర్వాత ఇన్పోసిస్ కంపెనీ ఎగ్జిక్యూటివ్ ఛైర్మన్‌గా బాధ్యతలను చేపట్టిన తర్వాత జరుగుతున్న తొలి వార్షిక సమావేశం. చిన్న స్దాయితో మొదలైన కంపెనీని అంతర్జాతీయ స్దాయికి తీసుకెళ్లిన నారాయణ మూర్తి తిరిగి కంపెనీ బాధ్యతలు నిర్వర్తించడంపై పరిశ్రమ వర్గాలు, నిపుణులు స్వాగతించినప్పటికీ.. వాటాదారులు మాత్రం గుర్రుగా ఉన్నట్లు సమాచారం.

అంతేకాకుండా నారాయణ మూర్తి తన వ్యక్తిగత సహాయకుడి(ఎగ్జిక్యూటివ్ అసిస్టెంట్)గా సొంత కుమారుడైన రోహన్ మూర్తిని నియమించకున్న విషయం తెలిసిందే. దీనిపై ఇన్వెస్టర్లు, వాటాదారులు మూర్తిని అడిగే అవకాశం ఉందని భావిస్తున్నారు. ఇన్పోసిస్ పాలసీ ప్రకారం యాజమాన్యానికి సంబంధించిన వ్యక్తులకు కంపెనీ పదవులను ఇచ్చేందుకు వీలు లేదు. ఇలా చేస్తే ఉత్తమమైన కార్పోరేట్ పరిపాలనను అతిక్రమించినట్లే. దీనితో పాటు కంపెనీ ప్రమోటర్లు, కంపెనీ వ్యవస్దాపకులు 65 ఏళ్ల వయసు వచ్చాక ఎగ్జిక్యూటివ్ వంటి పదవులు చేపట్టకూడదు.

ఐతే ఇటీవల కాలంలో ఇన్పోసిస్ ఆర్దిక ఫలితాలు దిగజారిపోవడంతో ఈ నెల 1న నిర్వహించిన సమావేశంలో కంపెనీ బోర్డు నారాయణ మూర్తిని డైరక్టర్‌గా నియమిస్తున్నట్లు ఉత్తర్వులు జారీ చేసింది. ఈ విషయంపై ఈరోజు జరగనున్న వార్షిక సాధారణ సమావేశంలో వాటాదారుల నుండి అనుమతిని పొందాల్సి ఉంది. ఈ సమావేశంలో వాటాదారుల నుండి అనుమతి పొందినట్లైతే జూన్ 1 నుండి ఐదేళ్ల పాటు ఇన్పోసిస్ డైరెక్టర్‌గా కొనసాగుతారు. ఈ ఐదేళ్ల పాటు పదవి కాలంలో నారాయణ మూర్తి వేతనంగా నెలకు ఒక రూపాయి తీసుకోనున్నారు. ఇక నాన్ ఎగ్జిక్యూటివ్ చైర్మన్ పదవి నుండి తప్పుకున్న కెవి కామత్ స్వతంత్ర డైరెక్టర్‌గా కొనసాగుతారు.

నారాయణ మూర్తి కుమారుడు రోహాన్ మూర్తికి 30 సంవత్సరాలు. రోహాన్ మూర్తి అమెరికాలోని హార్వర్డ్ యూనివర్సిటీలో కంప్యూటర్ సైన్స్ విభాగంలో పిహెచ్‌డీ చేశారు. కార్నెల్ యూనివర్సిటీ నుండి గ్రాడ్యుయేట్ పట్టా పొందారు. అమెరికాలోని మైక్రోసాప్ట్ రీసెర్చ్, ఎమ్ఐటీ.. కాల్టెక్ నుండి ఫెలో షిప్స్ అందుకున్నారు.

వన్ఇండియా మనీ తెలుగు