వాషింగ్టన్: 2013-14వ ఆర్దిక సంవత్సరంలో భారత్ స్దూల దేశీయోత్పత్తి (జీడీపీ) వృద్ది రేటు వాస్తవ ప్రాతిపదికన 5.7 శాతంగా ఉండొచ్చని ప్రపంచ బ్యాంక్ అంచనా వేసింది. అదే విధంగా 2014-15లో 6.5 శాతం, 2015-16లో 6.7 శాతం వృద్ది రేటు ఉండొచ్చని తెలిపింది. జనవరి ఎడిషన్‌లో ప్రపంచ బ్యాంక్ భారత్ స్దూల దేశీయోత్పత్తి (జీడీపీ) వృద్ది రేటు 6.1 శాతంగా ఉండొచ్చని అంచనా వేసి.. తాజాగా వృద్ది రేటు 5.7శాతంగా ప్రకటించడం గమనార్హాం. ఇక అదే విధంగా మన దేశ ఆర్దిక మంత్రి పి.చిదంబరం ఫిబ్రవరిలో 2013-14 సంవత్సరానికి గాను భారత స్దూల దేశీయోత్పత్తి (జీడీపీ) వృద్ది రేటు 6.1 నుండి 6.7 శాతంలో మద్యలో ఉండొచ్చని అన్న విషయం తెలిసిందే.

2003 నుండి గమనించినట్లైతే భారత్ స్దూల దేశీయోత్పత్తి (జీడీపీ) వృద్ది రేటు అత్యంత తక్కువగా 2012-13వ ఆర్దిక సంవత్సరంలో 5 శాతంగా నమోదైంది. ఈ ఏడాది ప్రపంచ వృద్ధి రేటు 2.2 శాతంగా ఉంటుందని, 2015లో 3.3 శాతానికి చేరుకోగలదని ప్రపంచ బ్యాంక్ అంచనా వేసింది. ఆర్దిక పరంగా బలంగా ఉన్న దేశాల్లో రిస్క్‌లు తగ్గి.. వృద్ది రేటు మెరుగుపడుతున్నప్పటికీ, అభివృద్ది చెందుతున్న దేశాల్లో మాత్రం కొన్ని కారణాల వల్ల వృద్ది రేటు ఒక మోస్తరుగా ఉండబోతుందని జీఈపీలో పేర్కొంది. ఈ సందర్బంలో ప్రపంచ బ్యాంక్ చీఫ్ ఎకానమిస్టు కౌశిక్ బసు మాట్లాడుతూ భారత్, బ్రెజిల్ తదితర దేశాల్లో సరఫరా లాంటి సమస్యలున్నాయని అన్నారు. అంతేకాకుండా ఈ సరఫరా సంస్కరణలు పూర్తిగా అమలు చేస్తే తప్ప ఈ దేశాలు సంక్షోభం నుండి పూర్తిగా వృద్ది సాధించలేవని అన్నారు.

వీటితో పాటు ఎగుమతులు, ప్రైవేట్ పెట్టుబడులు ఇందుకు ఊతం ఇవ్వగలవని ‘ప్రపంచ ఆర్థిక వృద్ధి అవకాశాల (జీఈపీ)' నివేదికలో ప్రపంచ బ్యాంకు వివరించింది. దక్షిణాసియా ప్రాంత అభివృద్ధిలో భారత్ కీలకపాత్ర పోషించనుందని పేర్కొంది. రికవరీ ఎంత భారీగా ఉంటుందో... పాలసీపరమైన, ఆర్థిక పరమైన సంస్కరణలపైన ఆధారపడి ఉంటుందని వివరించింది. ప్రస్తుతం భారత్ కరెంటు అకౌంటు లోటును కట్టడి చేసుకునేందుకు ఎక్కువగా విదేశీ పెట్టుబడులపై ఆధారపడుతుండటం వల్ల, ఒకవేళ ఇన్వెస్టర్ల సెంటిమెంటు ప్రతికూలంగా మారితే సమస్యలు ఎదుర్కొనాల్సి వస్తుందని ప్రపంచ బ్యాంకు పేర్కొంది.

వన్ఇండియా మనీ తెలుగు