న్యూఢిల్లీ: కొత్త బ్యాంకింగ్ లైసెన్స్‌ల కోసం గత ఫిబ్రవరిలో రిజర్వ్ బ్యాంక్ ఆఫ్ ఇండియా (ఆర్‌బీఐ) గైడ్ లైన్స్‌ను జారీ చేసినప్పటికీ.. దానికి సంబంధించిన తుది జాబితా మరింత ఆలస్యం అయ్యే సూచనలు కనిపిస్తున్నాయి. బ్యాంక్‌ను స్దాపించాలనుకునే కంపెనీలు గైడ్ లైన్స్‌లో కొన్ని ఇబ్బందులు ఉన్నాయని సూచించడంతో .. ఆ ఇబ్బందులకు సంబంధించి వందల కొద్ది ప్రశ్నలకు సమాధానాలను విపులంగా తెలిపింది. ఇక 2012-13వ సంవత్సరానికి గాను ప్రవేశపెట్టిన బడ్జెట్‌లో కేంద్ర ఆర్దిక మంత్రి పి.చిదంబరం మహిళల కోసం ప్రత్యేకంగా ఒక బ్యాంకును ప్రవేశపెట్టనున్నట్లు తెలిపిన విషయం తెలిసిందే. దీనికి సంబంధించి అక్టోబర్ నాటికి ఈ మహిళా బ్యాంక్‌ను ఏర్పాటు చేయాలన్న ఉద్దేశ్యంతో అనుమతి కోసం రిజర్వ్ బ్యాంక్‌ను ఆర్దిక మంత్రిత్వ శాఖ కోరిందని ఆర్దిక కార్యదర్శి రాజీవ్ టక్రూ తెలిపారు.

మహిళలే సొంతంగా బ్యాంక్ ఏర్పాటుపై నమూనాను ఏర్పాటు చేసేందుకు ఉద్దేశించిన కమిటీ దీనిపై ఆర్దిక మంత్రిత్వ శాఖకు నివేదకను సమర్పించింది. దేశంలో ఈ బ్యాంక్ ఆరు శాఖలను ప్రారంభించనుంది. దీని కార్యకలాపాలు ఈ నవంబర్ నుండి ప్రారంభమవుతాయని భావిస్తున్నారు. నవంబర్‌లో ఈ మహిళా బ్యాంక్‌ను ప్రారంభిస్తామని ఆర్దిక మంత్రి పి.చిదంబరం గతంలో ప్రకటించిన విషయం తెలిసిందే. దేశంలో దక్షిణం, పశ్చిమ, తూర్పు, మధ్య, ఉత్తర, ఈశాన్య భారతంలో కనీసం ఒక్కోశాఖను ప్రారంభిస్తామని... అంటే కనీసం ఆరు శాఖలను ప్రారంభిస్తామని ఆయన చెప్పారు.

రూ.1000 కోట్ల మూలధనంతో మహిళలే నిర్వహించే ఈ బ్యాంక్ మహిళలకు, మహిళలు నిర్వహించే వ్యాపారాలకు రుణాలు ఇస్తుంది. మహిళల స్వయం సహాయక గ్రూప్ (ఎస్‌హెచ్‌జి)లకు, వారి జీవనోపాధిని దృష్టిలో ఉంచుకుని వీటిని ఆర్థిక మంత్రిత్వ శాఖ ఏర్పాటు చేస్తోంది. అయితే మహిళలతో పాటు, పురుషుల నుంచి కూడా ఈ బ్యాంక్‌లు డిపాజిట్లను స్వీకరిస్తాయి.

వన్ఇండియా మనీ తెలుగు