ముంబై: అంతర్జాతీయ, దేశీయ మార్కెట్లో అనూహ్యంగా పెరిగిన బంగారం డిమాండ్‌కి అడ్డుకట్ట వేసేందుకు గాను బంగారు రుణాల మీద రిజర్వ్ బ్యాంక్ ఆఫ్ ఇండియా (ఆర్‌బీఐ) కొన్ని నిబంధనలు విధించింది. గోల్డ్ ఎక్స్చేంజీ ట్రేడెడ్ ఫండ్స్ (గోల్డ్ ఈటీఎఫ్), బంగారంలో ఇన్వెస్ట్ చేసే మ్యూచవల్ ఫండ్స్ యూనిట్స్‌పై రుణాలు ఇవ్వకూడదని బ్యాంకులు మరియు నాన్ బ్యాంకింగ్ ఫైనాన్స్ కంపెనీలకు మార్గదర్శకాలు జారీ చేసింది. దీనితో పాటు బ్యాంకులు విక్రయించే బంగారు నాణేలపై రుణాలు ఇస్తున్నప్పుడు బంగారు నాణేల బరువు 50 గ్రాములకు మించకుండా చూడాలని పేర్కొంది.

(How to take loan from PPF account?)

దీని ఉద్దేశ్యం ఏమిటంటే 50 గ్రాముల దాకా తూగే బంగారు నాణేలపై మాత్రమే రుణం ఇస్తారన్నమాట. ఒకవేళ ఎవరైనా కస్టమర్ 50 గ్రాములకు మించి బంగారు నాణేలను తాకట్టు పెడితే అటువంటి వాటికి రుణం లభించదు. బంగారు ఆభరణాలు, బ్యాంకులు విక్రయించే నాణేలపైనా రుణాలు కంపెనీ బోర్డు ఆమోదించిన మేరకు లోబడే ఉండాలని రిజర్వ్ బ్యాంక్ ఆఫ్ ఇండియా (ఆర్‌బీఐ) తన ప్రకటనలో పేర్కొంది. మరోవైపు బంగారాన్ని ఏ రూపంలోనైనా (బులియన్, ఆభరణాలు, నాణేలు, గోల్డ్ ఈటీఎఫ్‌లు మొదలైనవి) కొనడానికి సైతం రుణాలు ఇవ్వకూడదని ఎన్‌బీఎఫ్‌సీలకు సూచించింది.

దేశంలో ప్రస్తుతం కరెంటు అకౌంటు లోటు పెరిగిపోతుండటంతో బంగారం దిగుమతులను తగ్గించే విధంగా ప్రభుత్వం ఇటీవలే బంగారం దిగుమతి పన్నుని పెంచిన విషయం తెలిసిందే. బ్యాంకులు దిగుమతి చేసుకునే బంగారంపై కూడా ఆర్‌బీఐ నిబంధనలను విధించింది. ఇటీవల అంతర్జాతీయంగా బంగారం ధరలు భారీగా తగ్గడంతో బంగారం దిగుమతులు గత నెల 138 శాతం పెరిగి 7.5 బిలియన్ డాలర్లకు పెరిగాయి. ఈ ఏడాదిలో ఇదే అధికం. బంగారం దిగుమతులు భారీగా పెరగడంతో వాణిజ్య లోటు 17.7 బిలియన్ డాలర్లకు చేరుకుంది.

వన్ఇండియా మనీ తెలుగు