ఇక స్వయంగా ఐటీ శాఖ రంగంలోకి దిగి నోటీసులు పంపడంతో వాటికి మంచి స్పందన లభిస్తోందని, నోటీసులు అందుకున్న వారిలో చాలా మంది పన్నులు కడుతున్నారని, ఐటీ రిటర్న్‌లు ఫైల్ చేస్తున్నారని కేంద్ర ఆర్దిక మంత్రిత్వ శాఖ పేర్కొంది. గత ఏడాది రూ 5.65 లక్షల కోట్లుగా ఉన్న ప్రత్యక్ష పన్నుల వసూళ్లను ఈ ఏడాదిలో రూ 6.68 లక్షల కోట్లకు పెంచాలనేది ప్రభుత్వ లక్ష్యంగా పెట్టుకుంది. సేవా పన్ను ఎగవేతదారులను అరెస్ట్ చేసేందుకు మరియు ఏడేళ్ల వరకూ జైలు శిక్ష విధించేందుకు తగిన అధికారాలను రెవెన్యూ శాఖ అధికారులకు కలిగించేలా 2013 ఫైనాన్స్ బిల్లులో ఆమోద ముద్ర వేశారు. దీనితో సేవా పన్ను ఎగవేతదారులను అరెస్ట్ చేసేందుకు రెవెన్యూ అధికారులకు అధికారం లభించింది.

సేవా పన్ను కింద 17 లక్షలకుపైగా అసెసీలు రిజిస్టరై ఉన్నప్పటికీ, 7 లక్షల మంది మాత్రమే రిటర్న్‌లు దాఖలు చేస్తుండటంతో ఆర్థిక శాఖ ఈ పథకానికి రూపకల్పన చేయడం జరిగిందని చిదంబరం పేర్కొన్నారు. ఈ పథకంలో భాగంగా అసెసీలు 2013, డిసెంబర్ 31లోగా డిక్లరేషన్‌ను ఇవ్వాలి. దీంతోపాటు 50%కు తక్కువకాకుండా పన్ను బకాయిలను డిసెంబర్ 31లోగా చెల్లించాలి. ఆ తర్వాత 2014, జూన్ 30లోగా మిగిలిన బకాయిలను చెల్లించేందుకు కేంద్ర ఆర్దిక శాఖ అనుమతి ఇస్తుంది.