లండన్: ప్రపంచ కుబేరుల్లో ఒకరైన ఉక్కు దిగ్గజం లక్ష్మీనివాస్ మిట్టల్ ఎంతో ముచ్చటపడి కొనుగోలు చేసిన లండన్‌లోని వైభమైన భవనాన్ని అమ్మకానికి పెట్టారు. ఉక్కు వినియోగంలో చైనా నుండి డిమాండ్ పడిపోవడం.. ఆర్దిక సంక్షోభం నేపథ్యంలో ఈ నిర్ణయం తీసుకున్నట్లు సండే టైమ్స్ తెలిపింది. ప్రపంచం మొత్తంలో అత్యంత ఖరీదైన ఇళ్లు ఉండే చోటు బ్రిటన్‌లో కెన్సింగటన్. అలాంటి కెన్సింగటన్‌లోని ఈ ప్యాలెస్‌ను 2008లో 117 మిలియన్ పౌండ్లు వెచ్చించి లక్ష్మీనివాస్ మిట్టల్ కొనుగోలు చేయడం జరిగింది. 2008లో బ్రిటన్‌లో అత్యంత ఖరీదైన భవనంగా ఇది రికార్డు కూడా సృష్టించింది.

2008లో ఉన్న ధరతో పోల్చితే ఈ భవనం విలువ ఇప్పుడు 110 మిలియన్ పౌండ్లకు పడిపోవడంతో... లక్ష్మీనివాస్ మిట్టల్ ఈ ఖరైదన భవనాన్ని అమ్మేయాలనుకుంటున్నట్లు సండే టైమ్స్ ఓ వార్తా కథనంగా ప్రచురించింది. ఇక ఈ భవనం గురించి వివరాల్లోకి వెళితే... 12 బెడ్ రూమ్స్ ఉన్న ఈ రాజ భవనాన్ని మిట్టల్ తన కొడుకు ఆదిత్య కోసం ఇజ్రాయెల్-అమెరికన్ ఫైనాన్షియర్ నోవామ్ గాట్స్‌మెన్ వద్ద కొనుగోలు చేశారు. 14,736 చదరపు అడుగుల విస్తీర్ణం గల ఈ భవనంలోని తొలి అంతస్తులో మిట్టల్ డ్రెస్సింగ్ రూమ్‌తో కూడిన మాస్టర్ బెడ్‌రూమ్ క్వార్టర్స్ ఉన్నాయి. ఇదిలావుంటే ఈ భవనం అమ్మకం నేపథ్యంలో మరో కొత్త భవనంలోకి వెళ్లేదేమీ లేదని మిట్టల్ కొడుకు, ఆర్సెలార్ మిట్టల్‌కు చీఫ్ ఫైనాన్షియల్ ఆఫీసర్‌గానూ ఉన్న ఆదిత్య మిట్టల్, కుటుంబ సభ్యులు తెలిపారు.

గత ఏడాది వ్యాపారం సరిగా లేనందువల్ల లక్ష్మీ నివాస్ మిట్టల్ సంపద 2.7 బిలియన్ పౌండ్లకు పడిపోయింది. మరోవైపు ప్రస్తుతం ఉంటున్న ఇంటికి 57 మిలియన్ పౌండ్లు చెల్లించి సొంతం చేసుకున్న మిట్టల్..తన కూతురు వనిషా కోసం లండన్‌లోని ఫిలిప్పైన్ ఎంబసీని 70 మిలియన్ పౌండ్లకు కొనుగోలు చేయడం గమనార్హం.

వన్ఇండియా మనీ తెలుగు