హైదరాబాద్: ఇటీవల తీసుకున్న రుణం తిరిగి చెల్లించలేదని కోటక్ మహీంద్రా బ్యాంక్ డెక్కన్ క్రానికల్ హోల్డింగ్స్‌కు చెందిన ప్రింటింగ్ ప్రెస్‌ను సీజ్ చేసిన విషయం తెలిసిందే. దీనిని డెక్కన్ క్రానికల్ ఉద్యోగులు సవాల్ చేస్తూ హైకోర్టు సింగిల్ జడ్జిని ఆశ్రయించారు. ఉద్యోగులకు అనుకూలంగా ప్రింటింగ్ ప్రెస్‌ను తెరిచే విధంగా సింగిల్ జడ్జి తీర్పును ఇచ్చారు. కోర్టుల జోక్యంతో డెక్కన్ క్రానికల్ హోల్డింగ్స్‌కు చెందిన ముద్రణాలయం తిరిగి తెరుచుకుంది. ఐతే దీనిని సవాల్ చేస్తూ కోటక్ మహీంద్రా బ్యాంక్ హైకోర్టు డివిజనల్ బెంచ్‌లో రిట్ పిటీషన్ దాఖలు చేసినప్పటికీ.. డివిజన్ బెంచ్ సింగిల్ జడ్జి తీర్పును సమర్థిస్తూ కొన్ని నిబంధనలతో ప్రింటింగ్ ప్రెస్ కార్యకలాపాలు కొనసాగించుకోవచ్చని తీర్పులో పేర్కొంది.

(Gold saving schemes from jewellers: should you buy?)

ఇక వివరాల్లోకి వెళితే తీసుకున్న రూ. 50 కోట్ల రుణం చెల్లించలేదని డెక్కన్‌క్రానికల్ హోల్డింగ్స్‌కు చెందిన హైదరాబాద్ కొండాపూర్‌లో వున్న ప్రింటింగ్ కార్యాలయాన్ని కోటక్ మహీంద్రా బ్యాంక్ ఈ నెల 15న సీజ్ చేసింది. తీసుకున్న రుణం చెల్లింపు విషయంలో విఫలమైనందుకు గాను డెక్కన్ క్రానికల్ ప్రింటింగ్ కార్యాలయానికి తాళం వేసింది. ఇటీవలే న్యాయస్దానం స్వాధీన ఉత్తర్వులు జారీ చేసింది. దీంతో స్థానిక కోర్టు జారీచేసిన ఆర్డరు మేరకు అడ్వొకేట్లు, మాదాపూర్ పోలీసులతో కోటక్ మహీంద్రా అధికారులు బుధవారం ప్రింటింగ్ కార్యాలయానికి చేరుకోని న్యాయస్దానం జారీ చేసిన స్వాధీన ఉత్తర్వులను చూపించారు. ప్రింటింగ్ ప్రెస్ స్వాధీనానికి తమకు సహకరించాల్సిందిగా మాదాపూర్ పోలీసులను కోరడంతో వారూ వచ్చారు. కొండాపూర్ సర్వేనెంబర్ 186లోని 9892.6 చదరపు గజాల స్థలంతో ఈ భవనం ఉంది. అక్కడున్న సెక్యూరిటీ సిబ్బంది, ఇతరులతో బ్యాంకు అధికారులు మాట్లాడి కోర్టు ఉత్తర్వులు చూపించి తాళం వేశారు. దీనిపై వెంటనే స్పందించిన ఉద్యోగ సంఘాలు హైకోర్టులో రిట్ పిటీషన్ దాఖలు చేశాయి. వేసవి సెలవులు కావడంతో రిట్ పిటీషన్ వెకేషన్ కోర్టుకు వెళ్లింది.

ఉద్యోగుల భవిష్యత్తు, పత్రికా స్వేచ్ఛకు ముడిపడి ఉండటంతో జస్టిస్ ఎల్ నర్సింహారెడ్డి ఇంటి వద్దనే కేసు విచారణ చేపట్టారు. 1984, 1994 సంవత్సరాల్లో న్యూ ఇండియన్ ఎక్స్‌ప్రెస్‌కు చెందిన ప్రింటింగ్ ప్రెస్‌ను రహదారుల విస్తరణ, న్యూస్ ప్రింట్ పాలసీ నిబంధనల పేరుతో మూసి వేశారు. ఆ సందర్భంలో సుప్రీం కోర్టు జోక్యం చేసుకొని ప్రింటింగ్ ప్రెస్‌ను మూసివేయడం కచ్చితంగా భావస్వేచ్ఛను అడ్డుకోవడం కిందకే వస్తుందని, ప్రభుత్వాలకు అటువంటి హక్కు లేదని తీర్పు నిచ్చింది. ఈ తీర్పులను దృష్టిలో పెట్టుకొని సింగిల్ జడ్జి కూడా డెక్కన్ క్రానికల్ పై విధంగా స్పందించారు. ఈ తీర్పు కాపీలను తీసుకొని పోలీసుల వెంట రాగా రాత్రి 2.30 తర్వాత ప్రింటింగ్ ప్రెస్ కార్యాలయంలోకి ఉద్యోగులు అడుగు పెట్టారు.

వన్ఇండియా మనీ తెలుగు