న్యూఢిల్లీ: దేశీయ బ్యాంకింగ్ దిగ్గజం స్టేట్ బ్యాంక్ ఆఫ్ ఇండియా (ఎస్‌బీఐ) 2012-13 ఆర్దిక సంవత్సరపు నాల్గవ త్రైమాసికపు ఫలితాలు నిరుత్సాహపరిచాయి. ఎస్‌బీఐ నికర లాభం 18.54 శాతం తగ్గి రూ. 3,299 కోట్లుగా నమోదైంది. గత ఏడాది ఇదే త్రైమాసికంలో లాభం రూ. 4,050 కోట్లుగా నమోదైంది. గత రెండేళ్లలో ఎస్‌బీఐ లాభాలు ప్రకటించిన తర్వాత తగ్గడం ఇదే మొదటిసారి. ఈ సందర్బంలో ఎస్‌బీఐ చైర్మన్ ప్రతీప్ చౌధురి మాట్లాడుతూ మొండిబకాయిలు ఎగబాకడంతో ప్రొవిజనింగ్ కేటాయింపులు పెరగడం, నికర వడ్డీ ఆదాయం తగ్గడంతో బ్యాంక్ లాభాలు తగ్గాయన్నారు. ఐతే మొత్తం ఆదాయం Q4లో రూ. 36,331 కోట్లకు చేరుకున్నాయన్నారు.

ఇది ఇలా ఉంటే 2012-13 ఆర్థిక సంవత్సరానికి ఎస్‌బీఐ నికర లాభం 20 శాతం ఎగబాకి రూ. 14,105 కోట్లుగా నమోదైంది. దీంతో ఓఎన్‌జీసీ, రిలయన్స్ తర్వాత ఎక్కువ లాభాలు ఆర్జించిన మూడో కంపెనీగా ఎస్‌బీఐ నిలిచింది. నికర వడ్డీ ఆదాయాలను తగ్గించుకోవడంలో భాగంగా ఇన్వెస్ట్‌మెంట్ గ్రేడ్‌కు దిగువనున్న కంపెనీలకు రుణాలివ్వడంలో అత్యంత అప్రమత్తంగా వ్యవహరించనున్నాం. ఒకవేళ ఇటువంటి ఖాతాలకు రుణాలు ఇవ్వాల్సివచ్చినా... తగినమొత్తంలో కొలేటరల్ సెక్యూరిటీని తీసుకునేలా జాగ్రత్త వహిస్తాం. మంచి ట్రేడింగ్ పరిమాణం, తక్కువ హెచ్చుతగ్గులు ఉండే కంపెనీల స్టాక్స్‌లో మాత్రమే పెట్టుబడులు పెట్టాలని ఎస్‌బీఐ బ్యాంక్ నిర్ణయించిందని అన్నారు.

స్టేట్ బ్యాంక్ ఆఫ్ ఇండియా (ఎస్‌బీఐ) Q4 ముఖ్యాంశాలు:

* రుణ వృద్ధి 21 శాతంగా నమోదైంది.
* Q4లో నికర వడ్డీ మార్జిన్ 3.34 శాతానికి తగ్గింది.
* ఇక డిపాజిట్లు 15% వృద్ధితో రూ. 12.03 లక్షల కోట్లకు పెరిగాయి.
* Q4లో నికర వడ్డీ ఆదాయం రూ.11,591 కోట్లుగా నమోదైంది. గత ఏడాది ఇదే క్వార్టర్‌తో పోలిస్తే 4.42 శాతం తక్కువ.
* గత ఏడాది రూ. 10 ముఖ విలువగల ఒక్కో షేరుపై బ్యాంక్ రూ. 41.50 చొప్పున డివిడెండ్‌ను ప్రకటించింది.

వన్ఇండియా మనీ తెలుగు