న్యూఢిల్లీ: కార్పోరేట్ రంగంలో మరో సెక్స్ కుంభకోణం బయటపడింది. నాస్డాక్‌లో లిస్టెడ్ కంపెనీగా ఉన్న ఐగేట్ కార్పోరేషన్‌లో ఈ ఉదంతం బయటపడింది. ఈ లైంగిక వేధింపులకు పాల్పడింది సాక్షాత్తూ కంపెనీ ప్రెసిడెంట్, ఛీఫ్ ఎగ్జిక్యూటివ్ ఆఫీసర్ ఫనీష్ మూర్తి. ఐగేట్ కంపెనీలో ఛీప్ ఎగ్జిక్యూటివ్‌గా పని చేస్తున్న ఫనీష్ మూర్తి తన క్రింది ఉద్యోగిని లైంగిక వేధింపులకు గురి చేస్తుండటంతో అతనిని కంపెనీ బోర్డు డైరెక్టర్లు విధుల నుండి తప్పించారు. ప్రస్తుతం ఈ లైంగిక వేధింపుల విషయంపై విచారణ కొనసాగుతున్నప్పటికీ.. ఫనీష్ మూర్తి కంపెనీ పాలసీలను అతిక్రమించడం వల్లనే అతనిని విధుల నుండి తప్పించడం జరిగిందని కంపెనీ తన ప్రకటనలో పేర్కొంది.

బోర్డ్ ఒక తాత్కాలిక ప్రాతిపదికన ప్రెసిడెంట్, ఛీఫ్ ఎగ్జిక్యూటివ్ ఆఫీసర్‌గా గెర్హార్డ్ వాటింజర్‌ను నియమించింది. 52 సంవత్సరాల వయసు కలిగిన గెర్హార్డ్ వాటింజర్‌ 1998 నుండి 2013 వరకూ ఐగేట్ కంపెనీలో పలు రకాలైన పదవులను నిర్వర్తించారు. ముఖ్యంగా ఐగేట్ సోల్యూషన్స్ బిజినెస్‌కు సీఈవోగా బాధ్యతలను సమర్ధవంతంగా నిర్వర్తించారు. ఇక కంపెనీ కో ఫౌండర్, కో ఛైర్మన్ సునీల్ వాదావని మాట్లాడుతూ బోర్డ్, ఈ విషయం మీద విస్తృతంగా చర్చ జరిపింది. ఐటీ పరిశ్రమలో ఐగేట్ తనకంటూ ఓ ప్రత్యేకమైన స్దానాన్ని సంపాదించుకోవడంతో గత పది సంవత్సరాలుగా మూర్తి తన సేవలను అందించారన్నారు.

తన చక్కని పనితీరుతో ఐగేట్ ఎదుగుదలకు ఎంతో అభినందిస్తున్నామని అన్నారు. కంపెనీ ఎదుగుదలకు ఎంతగానో కృషి చేసినప్పటికీ... కంపెనీ పాలసీని అతిక్రమించడం వల్ల తనపై చర్యకుగాను విధుల నుండి తప్పించామని అన్నారు.

వన్ఇండియా మనీ తెలుగు