న్యూఢిల్లీ: 2013-14 సంవత్సరానికి గాను సేవా పన్ను ఎగగొట్టాలని చూసే వారికి ప్రభుత్వం గట్టి షాక్ ఇవ్వనుంది. ఇక మీదట సేవా పన్ను ఎగవేతదారులను అరెస్ట్ చేసేందుకు మరియు ఏడేళ్ల వరకూ జైలు శిక్ష విధించేందుకు తగిన అధికారాలను రెవెన్యూ శాఖ అధికారులకు కలిగించేలా 2013 ఫైనాన్స్ బిల్లులో ఆమోద ముద్ర వేశారు. దీనితో సేవా పన్ను ఎగవేతదారులను అరెస్ట్ చేసేందుకు రెవెన్యూ అధికారులకు అధికారం లభించింది. గతంలో ఎవరైనా సేవా పన్ను ఎగ్గొడితే వారిని అరెస్ట్ అధికారులు రెవెన్యూ శాఖకు లేవు. దీంతో వారు సరైన సమయంలో సరైన నిర్ణయాలు తీసుకోలేక సతమతమయ్యేవారు.

కొత్తగా లభించిన అధికారాల ప్రకారం ఏదైనా కంపెనీ మేనేజర్ లేదా డెరైక్టర్ సేవా పన్ను వసూళ్లను ప్రభుత్వానికి చెల్లించకపోతే అరెస్ట్ వంటి చర్యలను ఎదుర్కోవడంతో పాటు... ఏడేళ్ల వరకూ జైలు శిక్షకు గురికావాల్సి వస్తుంది. వీటితోపాటు రూ. లక్ష వరకూ జరిమానాను సైతం చెల్లించాల్సి ఉంటుంది. 2013 ఫైనాన్స్ బిల్లులో ఇందుకు అనుగుణంగా కస్టమ్స్, కేంద్ర ఎక్సైజ్ ట్యాక్స్ చట్టానికి చేసిన మార్పులను అనుమతిస్తోంది. దీనితో పాటు పరోక్ష పన్నుల వసూళ్లను పెంచే బాటలో ఆర్థిక శాఖ సర్వీస్ ట్యాక్స్ ఎగవేతదారులకు ఒకేసారి చెల్లించే (వన్‌టైమ్) ఆమ్నెస్టీ పథకాన్ని అందిస్తుంది.

ఇలా చేయడం వల్ల ఎగవేతదారులు జరిమానా లేదా ఆలస్యపు చార్జీల వంటి వడ్డింపులు లేకుండా తమ బకాయిలను చెల్లించేందుకు వీలు కలుగుతుంది. బకాయిలు చెల్లించేందుకు గాను 2007, అక్టోబర్1 మొదలు 2012, డిసెంబర్ 31 వరకూ అనుమతిస్తున్నారు. ఈ ఆమ్నెస్టీ పథకాన్ని రూపొందించడం ఇదే తొలిసారి. ఆర్థిక మంత్రి పి చిదంబరం 2013-14 బడ్జెట్‌లో దీనిని ప్రవేశపెట్టారు. సేవా పన్ను కింద 17 లక్షలకుపైగా అసెసీలు రిజిస్టరై ఉన్నప్పటికీ, 7 లక్షల మంది మాత్రమే రిటర్న్‌లు దాఖలు చేస్తుండటంతో ఆర్థిక శాఖ ఈ పథకానికి రూపకల్పన చేయడం జరిగిందని చిదంబరం పేర్కొన్నారు. ఈ పథకంలో భాగంగా అసెసీలు 2013, డిసెంబర్ 31లోగా డిక్లరేషన్‌ను ఇవ్వాలి. దీంతోపాటు 50%కు తక్కువకాకుండా పన్ను బకాయిలను డిసెంబర్ 31లోగా చెల్లించాలి. ఆ తర్వాత 2014, జూన్ 30లోగా మిగిలిన బకాయిలను చెల్లించేందుకు కేంద్ర ఆర్దిక శాఖ అనుమతి ఇస్తుంది.

వన్ఇండియా మనీ తెలుగు