హైదరాబాద్: ఐటీ సర్వీసుల దిగ్గజం మహీంద్రా సత్యం 2012-13వ సంవత్సరానికి గాను నాల్గవ త్రైమాసికపు ఫలితాలు ప్రకటించింది. మహీంద్రా సత్యం నికర లాభం 15% క్షీణించి రూ. 454 కోట్లకు తగ్గింది. ఐతే ఆదాయం 16 శాతం పెరిగి రూ. 1,936గా నమోదైంది. గత ఏడాదితో పోల్చితే నికర లాభం రూ. 534 కోట్లు. ఆదాయం రూ. 1,666 కోట్లు. పన్నుల కోసం ప్రొవిజనింగ్ మరియు ఆదాయాలు పెరగడం వల్ల లాభాలు తగ్గాయని మహీంద్రా సత్యం చైర్మన్ వినీత్ నయ్యర్ తెలిపారు. గత నాలుగేళ్ల నుండి మహీంద్రా సత్యంతో ప్రయాణం సంతృప్తిని కలిగిందన్నారు. ఫలితాలను ప్రకటించిన అనంతరం షేరు ఒక్కింటికి 30 శాతం డివిడెండ్ ప్రకటిస్తున్నట్లు ఆయన తెలిపారు.

గడిచిన గత నాలుగు సంవత్సరాల్లో మహీంద్రా సత్యం కంపెనీ డివిడెండ్ ప్రకటించడం ఇదే మొదటిసారి. ఇక టెక్ మహీంద్రాలో మహీంద్రా సత్యం విలీనంపై రాష్ట్ర హైకోర్టులో వాదనలు పూర్తి అయ్యాయని అన్నారు. తీర్పు అనుకూలంగా వస్తే ఏప్రిల్ 2011 నుండి విలీనం అమల్లోకి వస్తుందన్నారు. అమెరికా మాంద్యం నుండి పూర్తిగా బయటకు రావడంతో ఐటీ పరిస్దితి కాస్త మెరుగ్గా ఉంటుందని అన్నారు. ఐతే యూరప్ దేశాలు మాత్రం ఇంకా సమస్యలోనే ఉన్నాయని పేర్కొన్నారు. హెచ్1బీ వీసా నిబంధనలను కఠినతరం చేయాలన్న అమెరికా ప్రతిపాదనతో ఐటీ పరిశ్రమపైనా, తమ కంపెనీపైనా ఎంతో కొంత ప్రభావం పడకతప్పదని మహీంద్రా సత్యం సీఈవో సీపీ గుర్నాణీ చెప్పారు.

నాల్గవ త్రైమాసికంలో కంపెనీకి కొత్తగా మరో 43 క్లయింట్లు లభించారు. దీంతో మొత్తం క్లయింట్ల సంఖ్య 385కి చేరిందని సంస్థ సీఎఫ్‌వో వసంత్ కృష్ణన్ వివరించారు. కంపెనీని టేకోవర్ చేసిన సమయంలో అనుబంధ సంస్థల కోసం చేసిన కొన్ని ప్రొవిజనింగ్స్‌ను తిరిగి ఖాతాల్లో కలపడం వల్ల క్యూ4 లాభాల్లో అదనంగా రూ. 134 కోట్లు తోడయ్యాయని, ఫలితంగానే లాభం రూ. 454 కోట్లుగా నమోదైందని తెలిపారు. క్యూ4లో కొత్తగా 500 మంది, పూర్తి ఏడాదిలో నికరంగా 2,714 ఉద్యోగులు చేరడంతో మొత్తం ఉద్యోగుల సంఖ్య మార్చి 31 నాటికి 36,067కి చేరిందని ఆయన తెలిపారు. ఇక ఉద్యోగుల వలసలు 14 శాతంగా ఉన్నట్లు పేర్కొన్నారు.

వన్ఇండియా మనీ తెలుగు