హైదరాబాద్: ఆంగ్ల దిన పత్రిక డక్కన్ క్రానికల్ హోల్డింగ్స్‌కు హైదరాబాద్‌లోని శేరిలింగపల్లిలో ఉన్న ప్రింటింగ్ కార్యాలయాల్లో ఒకదానిని కోటక్ మహీంద్రా బ్యాంక్ సీజ్ చేసింది. ఇక వివరాల్లోకి వెళితే కోటక్ మహీంద్రా బ్యాంక్ గతంలో డక్కన్ క్రానికల్ హోల్డింగ్స్‌‌కు రుణం ఇచ్చింది. ఆ రుణాన్ని తిరిగి చెల్లించకపోవడంతో ఆ మొత్తం ఇప్పుడు రూ. 50.25 కోట్లకు పెరిగింది. తీసుకున్న రుణం చెల్లింపు విషయంలో విఫలమైనందుకు గాను డెక్కన్ క్రానికల్ ప్రింటింగ్ కార్యాలయానికి తాళం వేసింది. ఇటీవలే న్యాయస్దానం స్వాధీన ఉత్తర్వులు జారీ చేసింది.

దీంతో స్థానిక కోర్టు జారీచేసిన ఆర్డరు మేరకు అడ్వొకేట్లు, మాదాపూర్ పోలీసులతో కోటక్ మహీంద్రా అధికారులు బుధవారం ప్రింటింగ్ కార్యాలయానికి చేరుకోని న్యాయస్దానం జారీ చేసిన స్వాధీన ఉత్తర్వులను చూపించారు. ప్రింటింగ్ ప్రెస్ స్వాధీనానికి తమకు సహకరించాల్సిందిగా మాదాపూర్ పోలీసులను కోరడంతో వారూ వచ్చారు. కొండాపూర్ సర్వేనెంబర్ 186లోని 9892.6 చదరపు గజాల స్థలంతో ఈ భవనం ఉంది. అక్కడున్న సెక్యూరిటీ సిబ్బంది, ఇతరులతో బ్యాంకు అధికారులు మాట్లాడి కోర్టు ఉత్తర్వులు చూపించి తాళం వేశారు.

కార్యాలయంలోని మెషిన్లు, ఇతర సామాగ్రిని వీడియో చిత్రీకరించారు. తమకు రూ.50,28,51,220 మొత్తం బకాయి ఉందని, ఈ మొత్తాన్ని 2012 ఆగస్టు15 లోగానే చెల్లించాల్సి ఉందని నోటీసులో పేర్కొన్నారు. న్యాయ స్దానం ఉత్తర్వుల మేరకు స్వాధీన కార్యక్రమం పూర్తి అయ్యాక కోటక్ మహీంద్రా బ్యాంక్ అధికారులు ఆ స్దలంలో ఒక బ్యానర్ ఉంచారు. అండర్‌ది ప్రొవిజన్ ఆఫ్ సెక్షన్ 13(4)/ ఎస్‌ఏఆర్‌ఎఫ్‌ఈఏ ఎస్‌ఐ యాక్ట్ 2002 ప్రకారం సీజ్ చేసినట్లుగా పేర్కొన్నారు. బ్యాంకు అధికారులు తాళం వేసి వెళ్లాక ప్రింటింగ్ కార్యాలయంలో విధులు నిర్వహిస్తున్న రెండో షిప్టు సిబ్బంది సాయంత్రం విధులకు హాజరయ్యేందుకు రాగా.. అక్కడున్న కాపలాదారులతో మాట్లాడి విషయం తెలుసుకోని వెళ్లిపోయారు. ఇందులో సుమారుగా వంద మంది ఉద్యోగులు పని చేస్తున్నారు.

వన్ఇండియా మనీ తెలుగు