హైదరాబాద్: హైదరాబాద్‌కు చెందిన మైక్రో ఫైనాన్స్ సంస్ద ఎస్‌కెఎస్ మార్చితో ముగిసిన త్రైమాసికంలో రూ. 2.7 కోట్ల నికర లాభాన్ని ప్రకటించింది. ఐతే గత ఏడాది ఇదే త్రైమాసికంలో కంపెనీ రూ. 329 కోట్ల నికర నష్టాల్ని నమోదు చేసింది. ఇక ఈ ఏడాది జనవరి- మార్చి త్రైమాసికంలో కంపెనీ ఆదాయం 44 శాతానికి పెరిగి 66 కోట్ల రూపాయల నుండి 95 కోట్ల రూపాయలకు చేరింది. 2012-13 సంవత్సరానికి కంపెనీ నష్టాలు తగ్గినట్లు పేర్కొంది. 2011-12లో నమోదైన రూ. 1,361 కోట్లతో పోలిస్తే రూ. 297 కోట్లకు నష్టాలుగా ఉన్నట్లు పేర్కొంది. ఐతే పూర్తి ఆర్థిక సంవత్సరం రాబడి గత ఏడాదితో పోలిస్తే 24 శాతం తక్కువ కాగా రూ. 332 కోట్లు.

ఆన్‌లైన్‌లో ప్రావిడెంట్ ఫండ్‌ను ట్రాన్స్ ఫర్ చేయడం వల్ల ప్రయోజనాలు

గత కొన్ని క్వార్టర్లలో ఆంధ్రప్రదేశ్‌లో భారీ స్థాయిలో ఉన్న మొండిబకాయిలకు గాను రూ. 1,350 కోట్లను కేటాయించిన సంగతి తెలిసిందే. ఈ కేటాయింపులు కూడా సంస్థ లాభదాయకతపై ప్రభావం చూపింది. ఆంధ్రప్రదేశ్ మినహా ఇతర రాష్ట్రాల్లో రుణాల పంపిణీలో భారీ వృద్ధి ఉందని కంపెనీ వెల్లడించింది. తొలిసారి డిసెంబర్ క్వార్టర్‌లో రూ. 1.2 కోట్ల లాభాన్ని నమోదుచేయగా, మరోసారి అంతకుమించి లాభాలను సాధించగలిగినట్లు కంపెనీ సీఎఫ్‌వో ఎస్ ఢిల్లీరాజ్ తెలిపారు.

2012-13 ఆర్థిక సంవత్సరం మూడు, నాలుగు త్రైమాసికాల్లో లాభాలను ప్రకటించిన నేపథ్యంలో టర్న్ఎరౌండ్ సాధించామని, దీనిని కొనసాగిస్తామని చెప్పారు. కంపెనీలో ఎఫ్ఐఐల షేర్ హోల్డింగ్ 2011-12లో 13.41 శాతం కాగా ఇప్పుడు ఎఫ్ఐఐ షేర్ హోల్డింగ్ 35.94 శాతానికి పెరిగింది.

వన్ఇండియా మనీ తెలుగు