ముంబై: దేశంలో ఉన్న ప్రతి ఒక్కరికీ బ్యాంకింగ్ సేవలు అందుబాటులోకి తీసుకోని రావడం కోసం స్టేట్ బ్యాంక్ ఆఫ్ ఇండియా (ఎస్‌బీఐ) మరో అడుగు ముందుకేసింది. ఉద్యోగులు, కార్మికులు, విద్యార్దులు ప్రధాన లక్ష్యంగా 'స్టేట్ బ్యాంక్ ఆఫ్ ఇండియా స్మార్ట్ పేఅవుట్ కార్డు'ను ఆవిష్కరించింది. ‘ఎస్‌బీఐ స్మార్ట్ పేఅవుట్ కార్డ్' పేరుతో ఆవిష్కరించిన ఈ కార్డు బ్యాంకింగ్ సేవలకు అందుబాటులోలేని ఉద్యోగులకు, కాంట్రాక్టు కార్మికులకు, విద్యార్థులకు ఎంతో ఉపయోగపడుతుందని ఎస్‌బీఐ డిప్యూటీ ఎండీ (కార్పొరేట్ స్ట్రేటజీ అండ్ న్యూ బిజినెసెస్) ఆర్‌కే సరాఫ్ పేర్కొన్నారు. ఈ కార్డులో ఒకేసారి రూ. 10,000 వరకు జమ చేసుకోవచ్చని, ఐతే నెలకు రూ. 25,000 మాత్రం మించరాదని అన్నారు.

ప్రస్తుతం స్టేట్ బ్యాంక్ ఆఫ్ ఇండియా (ఎస్‌బీఐ)లో అకౌంట్ హోల్డర్లు కూడా ఈ కార్డును అదనపు కార్డుగా వినియోగించుకోవచ్చు. ఈ కార్డుకు రూ. 102 ఫీజును వసూలు చేస్తామని, దీనికి పదేళ్ల కాల పరిమితి ఉంటుందని తెలిపారు. తమ సొంత ప్రాంతానికి వెలుపల విద్యను అభ్యసిస్తూ తమ తల్లిదండ్రుల డెబిట్ కార్డును వినియోగిస్తుండే విద్యార్థులకు ఈ కార్డు ఎంతగానో దోహదపడుతుంది. ఇక యాజమాన్యాలు సైతం తమ కార్మికులకు వేతన చెల్లింపులకుగాను ఈ కార్డులను ఇవ్వవచ్చు. ఈ విషయమై ఇప్పటికే కార్పోరేట్ సంస్దలు, చిన్న మధ్య తరహా పరిశ్రమల యాజమాన్యాలతో మాట్లాడినట్లు తెలిపారు.

ఈ కార్డులను పొందడంలో సడలించిన కేవైసీ (నో యువర్ కస్టమర్) నిబంధనలను స్టేట్ బ్యాంక్ ఆఫ్ ఇండియా (ఎస్‌బీఐ) అమలుచేస్తుంది. తక్కువ వ్యయంతో డిపాజిట్లు పొందేందుకు సైతం ఎస్‌బీఐకి ఈ కార్డు ఉపయోగపడుతుందని అన్నారు.

వన్ఇండియా మనీ తెలుగు