ప్రముఖ డ్యుయిష్ బ్యాంక్ గత వారం బంగారం ధరలు విపరీతంగా తగ్గుతాయని అంచనా వేసింది. దీనితోపాటు 2000వ సంవత్సరం నుండి మెటల్ రంగంలో రిటర్న్ అతి తక్కువగా రావడం ఇప్పుడేనని పేర్కొంది.

ఇటీవలే గోల్డ్‌మన్ శాక్స్ మూడు నెలల అంచనాలను.. 1,615 డాలర్ల నుంచి 1,530 డాలర్లకు, ఏడాది అంచనాలను 1,550 డాలర్ల నుంచి 1,390 డాలర్లకు తగ్గించింది. కానీ, ఈ అంచనాలన్నింటినీ తలదన్నుతూ పసిడి పతనమైపోతోంది. ‘బంగారం తగ్గుతుండటం చాలా మంచి పరిణామం. ఎందుకంటే.. కొనాలనుకుంటున్న వారందరికీ దీని వల్ల బంగారం లాంటి అవకాశం వస్తుంది' అని ఇన్వెస్ట్‌మెంట్ గురు మార్క్ ఫేబర్ వ్యాఖ్యానించారు.

ఈ నెల మొదట్లో సొసైటీ జనరల్ ఇచ్చిన తన నివేదికలో "బంగారం ధర బుడగ మాదిరి ఉందని అభివర్ణించింది." ఈ అంచనా తర్వాత బంగారం ధరలు ఇటీవలే భారీగా క్షీణించిన విషయం తెలిసిందే.

క్రెడిట్ సూసీ ఈ నెలతో పాటు సంవత్సరంలో కూడా బంగారం ధరలు గణనీయంగా తగ్గుతాయని పేర్కొంది. ప్రస్తుతం బంగారంపై ఆసక్తి తగ్గిందని, ఇన్వెస్టర్లు ఇతర సాధనాలవైపు చూస్తున్నారని ట్రేడర్లు పేర్కొన్నారు. ఆర్దిక సంక్షోభం నుండి బయట పడేందుకు సైప్రస్ యూరోపియన్ దేశాలు తమ వద్ద ఉన్న బంగారాన్ని అమ్మేయొచ్చన్న అంచనాలు ఇందుకు కారణమని వారు పేర్కొన్నారు.