న్యూఢిల్లీ: గృహ, కారు రుణాలు తీసుకున్న కస్టమర్లకు స్టేట్‌ బ్యాంకు ఆఫ్‌ ఇండియా ఉచితంగా ప్రమాద బీమాని అందిస్తుంది. ఐతే ఈ బీమాని ఈ ఏడాది జులై నుండి నిలిపివేయనున్నట్లు ప్రకటించింది. ఎస్‌బీఐ ఈ విషయాన్ని తన కస్టమర్లకు ఈ విషయాన్ని నోటిఫికేషన్ ద్వారా తెలియిజేసింది. ఈ నోటిఫికేషన్‌లో గృహ రుణాలు, లేదా కార్ల రుణాలు తీసుకునే కస్టమర్లకు కాంప్లిమెంటరీ యాక్సిడెంట్‌ ఇన్సురెన్సు కవర్‌ (మరణిస్తే) మాత్రం వారికి ఇచ్చే సదుపాయాన్ని ఈ ఆర్థిక సంవత్సరం జులై 1, 2013 నుంచి ఉపసంహరించు కుంటున్నట్లు ప్రకటించింది. ఈ నేపథ్యం లో జూలై 1కి ముందు రుణ గ్రహీత ఎవరైనా మృతిచెందితే, ఇందుకు సంబంధించిన క్లెయిమ్‌ను నిర్దిష్ట గడువు (జూలై 1)కు ముందు సెటిల్ చేసుకోవాలని సూచించింది.

ఇది ఇలా ఉంటే ఎస్‌బీఐ ఈ ఉచిత బీమాని ఎందుకు నిలిపివేసిందో కారణాలు మాత్రం తెలుపలేదు. రూ.100 వార్షిక ప్రీమియంతో ఎస్‌బీఐ సేవింగ్స్ బ్యాంక్ అకౌంట్ హోల్డర్లకు రూ. 4 లక్షల యాక్సిడెంట్ ఇన్సూరెన్స్ కవరేజ్‌ని ఎస్‌బీఐ జనరల్ ఇన్సూరెన్స్ కంపెనీ లిమిటెడ్ అందిస్తున్న విషయం తెలిసిందే. ఎస్‌బీఐ జనరల్ ఇన్సూరెన్స్ సౌజన్యంతో దేశ వ్యాప్తంగా 70 లక్షల మంది తన అకౌంట్ హోల్డర్లకు వ్యక్తిగత ప్రమాద బీమా కవరేజ్‌ని అందిస్తున్నట్లు ఇటీవల ఎస్‌బీఐ పేర్కొంది. ఎస్‌బీఐ-ఆస్ట్రేలియా దిగ్గజ జనరల్ ఇన్సూరెన్స్ సంస్థ ఐఏజీ (ఇన్సూరెన్స్ ఆస్ట్రేలియా గ్రూప్) జాయింట్ వెంచర్‌గా ఎస్‌బీఐ జనరల్ ఇన్సూరెన్స్ కంపెనీ ఏర్పాటైంది.

వన్ఇండియా మనీ తెలుగు