ముంబై: ఎయిర్ ఏషియా టాటాలతో కలిసి భారత్‌లో ఏర్పాటు చేయనున్న విమానయాన కంపెనీని ఏర్పాటు చేసేందుకు విదేశీ పెట్టుబడుల ప్రోత్సాహక బోర్డు (ఎఫ్‌ఐపీబీ) నుండి అనుమతులు లభించినట్లు ఎయిర్ ఏషియా తెలిపింది. దీంతో దేశంలో విమానాలు నడిపేందుకు అవసరమైన లైసెన్స్ జారీ చేయడానికి మార్గం సుగమనం అయినట్లేనని పేర్కొంది. టాటా సన్స్, టెలిస్టా ట్రేడ్‌ప్లేస్తో కలిసి ఎయిర్ ఏషియా భారత్‌లో కార్యకలాపాలు ప్రారంభించనుంది. ఆసియాలో తక్కువ ధరల్లో విమాన సేవలందిస్తున్న అతిపెద్ద సంస్థగా ఎయిర్‌ ఆసియా ఇప్పటికే కొనసాగుతున్న సంగతి తెలిసిందే. ఇక ఎయిర్‌ ఆసియా తదుపరి అనుమతి కోసం డైరెక్టరేట్‌ జనరల్‌ ఆఫ్‌ సివిల్‌ ఏవియేషన్‌కు దరఖాస్తు చేయాల్సి వుంది.

ఇటీవలే విమాన సర్వీసుల నిర్వహణకు గాను ఎయిర్ ఏషియా(ఇండియా) ప్రైవేట్ లిమిటెడ్ పేరుతో భారతదేశంలో కంపెనీని ఏర్పాటు చేసింది. ఇందుకు సంబంధించిన పత్రాలను కార్పొరేట్‌ వ్యవహారాల శాఖకు సమర్పించింది. ప్రైవేటు రంగ కంపెనీగా ఐదు లక్షల కోట్ల రూపాయల అథీకృత మూలధనంతో 2013 మార్చి 28న జేవీ ఏర్పాటు జరిగిందని, ముంబై రిజిస్టర్డ్ ఆఫీసుగా ఉంటుందని సంబంధిత వర్గాలు వెల్లడించాయి. దీన్ని కొన్నాళ్ల తర్వాత మార్చుకునే అవకాశం ఉంది. ఎయిర్‌లైన్ లోగో, మెమొరాండమ్ ఆఫ్ అసోసియేషన్ ఇతరత్రా పత్రాలను మార్చి 11న కంపెనీ దాఖలు చేసింది.

రూ. 80 కోట్ల ప్రారంభ పెట్టుబడితో ప్రారంభమవుతున్న ఈ జేవీలో ఎయిర్‌లైన్స్‌లో ఎయిర్‌ఏషియా 49 శాతం, టాటాసన్స్‌ 30 శాతం, టెలిస్ట్రా ట్రేడ్‌ప్లేస్‌ 21 శాతం పెట్టుబడులు పెట్టి కొత్త ఎయిర్‌లైన్‌ను ప్రారంభిస్తాయని ఎయిర్ ఏషియా ప్రకటించిన సంగతి తెలిసిందే. మలేషియా కంపెనీ తొలివిడతలో 3 నుండి 5 కోట్ల డాలర్ల పెట్టుబడులు తీసుకురానుంది. ఎయిర్ ఏషియా ప్రాథమిక పెట్టుబడిగా సుమారు రూ. 275 కోట్లు వెచ్చించనుంది. ఈ ఎయిర్‌లైన్స్ తక్కువ చార్జీల విధానాన్నే కస్టమర్స్‌కు అందిస్తుంది.

మొదటగా 3-4 ఎయిర్‌బస్ ఏ-320 విమానాలతో సర్వీసులను ప్రారంభించి ఆతర్వాత వీటి సంఖ్యను వేగంగా పెంచుతామన్నారు. చెన్నై ప్రధాన కేంద్రంగా ఈ ఎయిర్‌లైన్స్ నడవనుందని ఎయిర్ ఏషియా చీఫ్ ఎగ్జిక్యూటివ్(సీఈఓ) టోనీ ఫెర్నాండెజ్ తెలిపారు. భారత్‌లో ఎయిర్‌ఏషియా జెట్‌ ఎయిర్‌వేస్‌, స్పయిస్‌జెట్‌, ఇండిగో, గో ఎయిర్‌తో పాటు ఎయిర్‌ ఇండియాతో పోటీపడతాయి. చెన్నై ప్రధాన కేంద్రంగా ఈ ఎయిర్‌లైన్స్ నడవనుందని ఎయిర్ ఏషియా చీఫ్ ఎగ్జిక్యూటివ్(సీఈఓ) టోనీ ఫెర్నాండెజ్ తెలిపారు.

వన్ఇండియా తెలుగు మనీ