ముంబై: అంతర్జాతీయ మార్కెట్లో బంగారం ధర వరుసగా నాల్గవ రోజు కూడా తగ్గింది. ఎన్నడూ లేని విధంగా దేశీయ బులియన్ మార్కెట్లో 10 నెలల కనిష్టానికి చేరింది. నిన్న దేశ రాజధాని న్యూఢిల్లీలో 99.9 శాతం, 99.5 శాతం పూర్తి స్వచ్చత కలిగిన 10 గ్రాముల బంగారంపై రూ. 100 తగ్గి వరుసగా రూ. 29,500, రూ. 29,300గా నమోదవ్వగా.. ఇక ముంబైలో 10 గ్రాములకు రూ. 215 తగ్గి రూ. 29,120 వద్ద నిలిచింది. దీనికి కారణం అంతర్జాతీయ విపణిలో పెరిగిన అమ్మకాలు ప్రభావాన్ని చూపాయని విశ్లేషకులు భావిస్తున్నారు.

ఇది ఇలా ఉంటే వెండి ధరలు కూడా వరుసగా గత నాలుగు రోజుల నుండి తగ్గుతూనే ఉన్నాయి. కిలో వెండి ధర రూ. 130 నష్టంతో రూ. 51,980 వద్ద స్థిరపడింది. దీంతో 15 నెలల కనిష్ట స్థాయికి వెండి ధర దిగజారింది. పారిశ్రామికవర్గాలు తక్కువగా వెండి కొనుగోలు చేయడంతో ఈ ధర పలికిందని మార్కెట్‌ వర్గాలు పేర్కొన్నాయి.100 వెండి నాణేల ధర రూ.78,000గా నమోదయ్యింది.

మరోవైపు అంతర్జాతీయ మార్కెట్లలోనూ బంగారం ధరలు మరింతగా తగ్గుతున్నాయి. ఇందుకు కారణం డాలర్ పటిష్టపడుతుండటమే. దీంతో వరుసగా నాల్గవ రోజూ బంగారం ధరలు దిగివచ్చాయి. ఇది ఇలా ఉంటే నిన్న లండన్ మార్కెట్లో బంగారం ఔన్స్ ధర 1% క్షీణించి 1540 డాలర్లను తాకింది.

వన్ఇండియా తెలుగు మనీ