స్విట్జర్లాండ్ కంపెనీ, నోవార్టిస్‌కు సుప్రీం కోర్టులో చుక్కెదురు

న్యూఢిల్లీ: జనరిక్ ఔషధాలకు సంబంధించి తీర్పును భారతదేశపు అత్యున్నత న్యాయస్దానమైన సుప్రీంకోర్టు వెల్లడించింది. ఈ తీర్పుతో భారత్‌లో క్యాన్సర్ డ్రగ్ పేటెంట్‌కు సంబంధించిన నోవర్టీస్‌కు ఎదురుదెబ్బ తగిలింది. క్యాన్సర్ చికిత్సలో ఉపయోగించే తమ ఔషధం, గ్లివిక్‌కు భారత్‌లో పేటెంట్ ఇవ్వాలని, దీనికి జనరిక్ ఔషధాలు తయారు చేయకుండా భారత ఫార్మా కంపెనీలను నిరోధించాలని కోరుతూ స్విట్జర్లాండ్ కంపెనీ, నోవార్టిస్ దాఖలు చేసిన పిటిషన్‌ను అత్యున్నత న్యాయస్థానం కొట్టివేసింది. గ్లివిక్‌ అనే ఔషదాన్ని క్రానిక్ మైలాయిడ్‌ ల్యూకేమియాతో పాటు ఇతర క్యాన్సర్‌ వ్యాధులను నివారించేందుకు వాడుతారు. ఈ ఔషధం ఖరీదు అంతర్జాతీయ మార్కెట్లో రూ. 1.2 లక్షలు ఉంటే జనరిక్‌ వెర్షన్‌ భారత్‌లో మాత్రం 8వేల రూపాయలకు లభిస్తుండటంతో నోవార్టిస్ కంపెనీ సుప్రీంకోర్టుని ఆశ్రయించింది. చౌక ధరలకే ప్రాణాధార జనరిక్ ఔషధాలను భారత్ ఫార్మా రంగం అందిస్తుండటంతో.. ఈ పేటెంట్‌ను నోవార్టిస్‌కు ఇస్తే భారత్ ఫార్మా రంగంతో పాటు, ప్రపంచం ఫార్మారంగంపై కూడా దీని ప్రభావం పడుతుందని అందుకే ఈ పటేంట్ ఇవ్వకూడదని డ్రగ్‌ కంపెనీలు కోరుతున్నాయి.

ఇక వివరాల్లోకి వెళితే 2006లో క్యాన్సర్ చికిత్సలో ఉపయోగించే గ్లివెక్ ఔషధంలో కొత్తగా మార్పులు చేశామని, కొత్తగా పేటెంట్ హక్కులివ్వాలని భారత పేటెంట్ కార్యాలయాన్ని స్విట్జర్లాండ్‌కు చెందిన నోవార్టిస్ కంపెనీ కోరింది. అంతేకాకుండా క్యాన్సర్ చికిత్సలో ఉపయోగించే తమ ఔషధం, గ్లివిక్‌కు భారత్‌లో పేటెంట్ ఇవ్వాలని, దీనికి జనరిక్ ఔషధాలు తయారు చేయకుండా భారత ఫార్మా కంపెనీలను నిరోధించాలని కోరుతూ స్విట్జర్లాండ్ కంపెనీ, నోవార్టిస్ కోరుతుంది. భారత పేటెంట్ చట్టం, సెక్షన్ 3(డీ), సెక్షన్ 3(బి)లను ప్రస్తావిస్తూ ద కంప్ట్రోలర్ జనరల్ ఆఫ్ పేటెంట్ అండ్ డిజైన్ సంస్థ నోవార్టిస్ విన్నపాన్ని తోసిపుచ్చింది. సెక్షన్ 3(డి) ప్రకారం ఇంతకు ముందే వాడుకలో ఉన్న ఔషధాల పనితీరు మరింత మెరుగైనవి అయితే తప్ప పేటెంట్ ఇవ్వరు.

ఇక సెక్షన్ 3(బి) ప్రకారం ప్రస్తుతమున్న ఔషధాల కంటే మెరుగైన పనితీరు పేటెంట్ కోసం దరఖాస్తు చేసుకున్న కొత్త ఔషధాల్లో లేనప్పుడు, విస్తృత ప్రజా ప్రయోజనాలను దృష్టిలో పెట్టుకొని ఈ కొత్త ఔషధానికి పేటెంట్‌ను నిరాకరించవచ్చు. ఈ రెండు సెక్షన్లను ఉటంకిస్తూ పేటెంట్ విభాగం నోవార్టిస్‌కు వ్యతిరేకంగా తీర్పునిచ్చింది. దీనిని సవాల్ చేస్తూ చెన్నై కేంద్రంగా పనిచేసే ఇంటలెక్చువల్ ప్రాపర్టీ అప్పిలేట్ బోర్డ్(ఐపీఏబీ)ను నోవార్టిస్ సంప్రదించింది. అక్కడ కూడా చుక్కెదురవడంతో ఈ కంపెనీ సుప్రీంకోర్టును ఆశ్రయించింది. ఈ కేసులో గత ఏడాది డిసెంబర్ 4 వరకూ విచారణ జరిపిన జస్టిస్ ఆఫ్తాబ్ ఆలం, రంజన్ ప్రకాష్ దేశాయ్‌లు సభ్యులుగా ఉన్న సుప్రీంకోర్టు ధర్మాసనం ఈరోజు తీర్పును వెల్లడించింది.

వన్ఇండియా తెలుగు మనీ