ముంబై: దేశీయ విమానయాన ఛార్జీలు మరింత ప్రియం కానున్నాయి. ఎయిర్ ఇండియా, జెట్ ఎయిర్ వేస్ కంపెనీలు విమాన టిక్కెట్లపై ఇంధన సర్ ఛార్జీని రూ. 150 వరకూ పెంచుతున్నట్లు పేర్కొన్నాయి. వెయ్యి కిలోమీటర్ల లోపు ప్రయాణానికి సర్ చార్జీని రూ. 100, వెయ్యి కిలోమీటర్లు మించిన ప్రయాణానికి రూ. 150 చొప్పున పెంచాలని ఈ రెండు సంస్దలు నిర్ణయం తీసుకున్నాయి. ఈ పెంపు నిర్ణయం ఈ నెల మూడో వారం మొదలు నుండి బుక్ చేసుకున్న టిక్కెట్లకు వర్తిస్తుందని సమాచారం.

సాధారణంగా వేసవి సీజన్‌ ప్రారంభానికి ముందు డిమాండ్ ఎక్కువగా ఉండడంతో ఈ కంపెనీలు ఇంధన సర్‌చార్జీని పెంచేశాయి. 2008లో అంతర్జాతీయ ఆర్థిక సంక్షోభం నుంచి ఇంధన సర్‌చార్జీని వసూలు చేస్తున్నారు. విమానయాన సంస్థల నిర్వహణలో ఇంధన వ్యయం 40 శాతంగా ఉంటుంది. ఈ వ్యయం తట్టుకోవడానికి కంపెనీలకు వెసులుబాటును కల్పించడానికి ఇంధన సర్‌చార్జీని అమలు చేస్తున్నారు. ఇది ఇలా ఉంటే చౌక ధరల విమానయాన సంస్థ ఇండిగో కూడా త్వరలో ఇంధన సర్ చార్జీపై నిర్ణయం తీసుకోనున్నదని సమాచారం.

వన్ఇండియా తెలుగు మనీ