హైదరాబాద్: కోర్టుల్లో వివాదాలు పరిష్కారం కాకపోవడంతో టెక్ మహీంద్రాలో సత్యం కంప్యూటర్ సర్వీసెస్ లిమిటెడ్ (ప్రస్తుతం మహీంద్రా సత్యం) విలీనం ప్రతిపాదనను మరో 6 నెలలు పొడిగిస్తూ యాజమాన్యం నిర్ణయం తీసుకుంది. టెక్ మహీంద్రాలో విలీన ప్రతిపాదనను ఆమోదిస్తూ గతంలో సంస్ద డైరెక్టర్లు చేసిన తీర్మానం ఈ నెలాఖరులో ముగియనున్నందున, ఈ మేరకు విలీన పథకాన్ని సెప్టెంబరు 30కి వాయిదా వేస్తూ బోర్డు డైరెక్టర్లు నిర్ణయం తీసుకున్నారని సత్యం కంప్యూటర్స్ సర్వీసెస్ బాంబే స్టాక్ ఎక్సేంజ్ (బీఎస్ఈ)కి సమాచారం అందజేసింది.

మార్కెట్ రెగ్యులేటరీ నియంత్రణ సంస్ద సెక్యూరిటీస్ అండ్ ఎక్సేంజ్ బోర్డ్ ఆఫ్ ఇండియా (సెబీ), కాంపిటేషన్ కమీషన్ ఆఫ్ ఇండియాతో పాటు స్టాక్ ఎక్సేంజ్‌లు, వాటాదార్ల సమావేశాల్లో విలీనానికి సంస్ద అనుమతి పొందింది. ఈ నేపధ్యంలో గడువు పొడిగిస్తూ నిర్ణయం తీసుకున్నారు. సత్యం కంప్యూటర్స్‌తోపాటు వెంచర్‌బే కన్సల్టెంట్స్, సీఅండ్‌ఎస్ సిస్టమ్స్ టెక్నాలజీస్, మహీంద్రా లాజిసాఫ్ట్ బిజినెస్ సొల్యూషన్స్, కాన్వాస్-ఎం టెక్నాలజీస్‌ల విలీనం వాయిదా పడింది.

ఐఎల్‌అండ్‌ఎఫ్‌ఎస్ ఇంజనీరింగ్ అండ్ కన్‌స్ట్రక్షన్ కంపెనీ (గతంలో మేటాస్ ప్రాపర్టీస్), మైనారిటీ వాటాదారులు గతంలో ఆంధ్రప్రదేశ్ హైకోర్టులో వేసిన దావా పెండింగులో ఉన్నందున కంపెనీ ముందుకు వెళ్లలేదు. సత్యం కంప్యూటర్స్ తమకు రూ.1,230 కోట్లు చెల్లించాలంటూ ఐఎల్‌అండ్‌ఎఫ్‌ఎస్, స్వాప్ రేషియాను సవాల్ చేస్తూ మైనారిటీ వాటాదారులు కోర్టుకెక్కిన సంగతి తెలిసిందే. సత్యం కంప్యూటర్స్‌లో మెజారిటీ వాటాను 2009లో మహీంద్రా గ్రూపు దక్కించుకుంది.

వన్ఇండియా తెలుగు మనీ