చందా కొచ్చర్:

చందాకొచ్చర్ 1984లో ఐసీఐసీఐ బ్యాంకులో మేనేజ్ మెంట్ ట్రైనీ గా చేరారు. ఈరోజు ఆమె ఐసీఐసీఐ బ్యాంక్ మేనేజింగ్ డైరెక్టర్ పదవిలో ఉన్నారు. అంతేకాకుండా ఐసీఐసీఐ బ్యాంకులో అంతటి గొప్ప పదవిని నిర్వహిస్తున్న మొట్టమొదటి మహిళ ఈమె కావడం విశేషం.

చందా కొచ్చర్ సారధ్యంలో 2001, 2003, 2004, 2005వ సంవత్సరానికి "భారతదేశం లో ఉత్తమ రిటైల్ బ్యాంక్" అవార్డుని సొంతం చేసుకుంది. 2004వ సంవత్సరానికి చందా కొచ్చర్‌ని రీటైలర్ బ్యాంకర్ ఆఫ్ ద ఇయర్ అవార్డు వరించింది. 2010లో భారత ప్రభుత్వం ఎంతో ప్రతిష్టాత్మకంగా ఇచ్చే పద్మభూషణ్ అవార్డు కూడా ఈమెను వరించింది.

ఇందిరా క్రిష్టమూర్తి నూయి:

ఇందిరా క్రిష్టమూర్తి నూయి పెప్సికో కంపెనీకి ఛైర్మన్, ఛీఫ్ ఎగ్జిక్యూటివ్ ఆఫీసర్ బాధ్యతలను నిర్వహిస్తున్నారు. నూయి తమిళనాడులోని చెన్నైలో జన్మించింది. 2009వ సంవత్సరంలో బ్రెండన్ వుడ్ ఇంటర్నేషనల్ అనే అడ్వజైరీ ఏజెన్సీ టాప్ గన్ సీఈవోలలో ఈమెను ఒకరిగా పేర్కొంది. ఇక 2010లో ఫార్చున్ మ్యాగజైన్ ప్రకటించిన "50 మోస్ట్ పవర్ పుల్ ఉమెన్" లలో #1 స్దానాన్ని కైవసం చేసుకోగా.. అదే సంవత్సరంలో ఫోర్బ్స్ ప్రకటించిన ప్రపంచంలో కెల్లా 100 మోస్ట్ పవర్ పుల్ ఉమెన్ జాబితాలో #6వ స్దానాన్ని కైవసం చేసుకున్నారు.

కిరణ్ ముంజుదార్ షా:

కిరణ్ ముంజుదార్ షా ఒక పారిశ్రామిక వేత్త. బెంగుళూరు కేంద్రంగా పనిచేస్తున్న బయోటెక్నాలజీ కంపెనీ అయినటువంటి బయోకాన్ సంస్ద చైర్మన్, మేనేజింగ్ డైరెక్టర్. 2002లో కిరణ్ ముంజుదార్ షా కర్ణాటక ప్రభుత్వం ఇచ్చేటటువంటి కర్ణాటక రాజ్యోత్సవ అవార్డుతో పాటు బిజినెస్ ఉమెన్ ఆఫ్ ద ఇయర్ అవార్డుని పొందారు. ఫోర్బ్స్ మ్యాగజైన్ ప్రకటించిన 100 మోస్ట్ పవర్ పుల్ ఉమెన్ - 2012లో 80వ ర్యాంకుని సొంతం చేసుకున్నారు.

నైనా లాల్ కిద్వాయ్:

నైనా లాల్ కిద్వాయ్ ఇండియన్ బ్యాంకర్, బిజినెస్ ఎగ్జిక్యూటివ్. ప్రస్తుతం ఈమె భారతదేశానికి చెందిన HSBC ఇండియా గ్రూప్ అధిపతిగా ఉన్నారు. హార్వర్డ్ బిజినెస్ స్కూల్ నుండి పట్టా పొందారు. ట్రేడ్, ఇండస్ట్రీ రంగంలో ఈమె అందించిన సేవలకు గాను కేంద్ర ప్రభుత్వం ఈమెను పద్మ శ్రీ అవార్డుతో సత్కరించింది.