ముంబై: డెబిట్, క్రెడిట్ కార్డుల మోసాలను నియంత్రించేందుకుగాను అంతర్జాతీయ లావాదేవీలపై ద్రవ్యపరమైన పరిమితిని విధించాలని రిజర్వ్ బ్యాంక్ ఆఫ్ ఇండియా (ఆర్‌బీఐ) బ్యాంకులకు సూచించింది. దీనితో పాటు కస్టమర్లు ప్రత్యేకంగా కోరనిదే గ్లోబల్ యాక్సెస్‌తో కార్డులను జారీ చేయవద్దని కూడా ఆదేశించింది. ఇక గతంలో అంతర్జాతీయ లావాదేవీల కోసం వినియోగించే అన్ని గ్లోబల్ కార్డులపై 500 డాలర్ల పరిమితిని విధించాలని, వీలుంటే అటువంటి కార్డుల జారీని నిలిపివేయాలని నిర్దేశించింది.

క్రెడిట్‌, డెబిట్‌ కార్డుల లావాదేవీల విషయంలో అదనపు జాగ్రత్తలు తీసుకోవాలని పేర్కోంది. యాక్టివ్ ఇంటర్నేషనల్ కార్డులు అన్నింటిపై ఇలాంటి లావాదేవీల పరిమితిని బ్యాంకులు విధించవచ్చని తెలిపింది. జూన్ 30 లోపు కస్టమర్ రిస్క్ ప్రొఫైల్ ఆధారంగా ఈ మేరకు చర్యలు తీసుకోవాలని సూచించింది. ఈ మేరకు ఆర్‌బీఐ ఒక నోటిఫికేషన్ జారీ చేసింది. ఆర్థిక రంగంలో సైబర్ నేరాలు పెరుగుతున్న నేపథ్యంలో వీటిని అరికట్టడానికి తగిన అన్ని చర్యలను తీసుకోవడంపై బ్యాంకులు దృష్టి పెట్టాలని ఆర్‌బీఐ సూచించింది.

కార్డులో అదనపు సెక్యూరిటీ ఫ్యూచర్లను ప్రవేశపెట్టడంతోపాటు, మోసాలను నిరోధించడానికి తగిన వ్యవస్థను అవసరమని పేర్కొంది. కార్డ్ హోల్డర్ ఒక్క ఎస్‌ఎంఎస్‌తోనే తన కార్ట్ లావాదేవీని బ్లాక్ చేయగలిగేలా కొత్త పద్దతుల్ని ప్రవేశపెట్టాలని సూచించింది. ఇటీవలి కాలంలో కార్డ్ మోసాలు పెరుగుతున్న నేపథ్యంలో ఆర్‌బీఐ ఈ తాజా ప్రకటన చేసింది. క్రెడిట్ కార్డ్ మోసాలను అరికట్టేందుకు గాను ఎలక్ట్రానిక్ బ్యాంకింగ్ వ్యవస్థలో ప్రపంచ వ్యాప్తంగా ఒక ఏకీకృత భద్రతా వ్యవస్థను ఆవిష్కరించాల్సిన అవసరం ఉందని రిజర్వ్ బ్యాంక్ ఆఫ్ ఇండియా (ఆర్‌బీఐ) డిప్యూటీ గవర్నర్ హెచ్‌ఆర్ ఖాన్ వ్యాఖ్యానించారు.

తెలుగు వన్ఇండియా