న్యూఢిల్లీ: భారత్‌కు చెందిన టాటా గ్రూప్, మలేసియాకు చెందిన చౌక ధరల ఎయిర్‌లైన్స్ ఎయిర్ ఏషియాతో కలిసి ఏర్పాటు చేయనున్న కొత్త విమానయాన కంపెనీ ఈ ఏడాది చివరికల్లా తన కార్యకలాపాలను ప్రారంభించనుంది. ఇందులో ఎయిర్ ఏషియా ప్రాథమిక పెట్టుబడిగా సుమారు రూ. 275 కోట్లు వెచ్చించనుంది. ఈ ఎయిర్‌లైన్స్ తక్కువ చార్జీల విధానాన్నే కస్టమర్స్‌కు అందిస్తుంది. మొదటగా 3-4 ఎయిర్‌బస్ ఏ-320 విమానాలతో సర్వీసులను ప్రారంభించి ఆతర్వాత వీటి సంఖ్యను వేగంగా పెంచుతామన్నారు. చెన్నై ప్రధాన కేంద్రంగా ఈ ఎయిర్‌లైన్స్ నడవనుందని ఎయిర్ ఏషియా చీఫ్ ఎగ్జిక్యూటివ్(సీఈఓ) టోనీ ఫెర్నాండెజ్ మలేసియా నుంచి గురువారం గ్లోబల్ టెలీకాన్ఫరెన్స్‌లో వివరించారు.

ఈ ఏడాది చివరి క్వార్టర్(అక్టోబర్-డిసెంబర్) లేదా శీతాకాల సీజన్‌లో కార్యాకలాపాలను ఆరంభించే అవకాశాలున్నాయని తెలిపారు. ఈ ఎయిర్‌లైన్స్‌కు పేరును కొద్ది వారాల్లోనే ఖరారు చేయనున్నామని, తదుపరి సీనియర్ మేనేజ్‌మెంట్‌ను కూడా ప్రకటించనున్నట్లు టోనీ వెల్లడించారు. ప్రతిపాదిత ఎయిర్‌లైన్స్ డెరైక్టర్ల బోర్డులో ఎక్కువ మంది భారతీయులే ఉంటారన్నారు. టాటాలతో జాయింట్ వెంచర్(జేవీ)తో కొత్త ఎయిర్‌లైన్స్‌ను ఏర్పాటుచేస్తున్నట్లు ఎయిర్ ఏషియా ప్రకటించిన సంగతి తెలిసిందే. ప్రారంభంలో 300 మంది ఉద్యోగులతో పనులు ప్రారంభిస్తామని ఆయన చెప్పారు.

ఈ జాయింట్ వెంచర్‌లో టాటా గ్రూప్ కంపెనీల హోల్డింగ్ సంస్థ టాటా సన్స్‌కు 30 శాతం, మరో ఇన్వెస్టర్ అరుణ్ భాటియాకు చెందిన టెలెస్ట్రా ట్రేడ్‌ప్లేస్ అనే ఇన్వెస్ట్‌మెంట్ సంస్థకు 21 శాతం చొప్పున వాటాలు ఉండేలా ఒప్పందం కుదిరింది. 49 శాతం మెజారిటీ వాటా మాత్రం ఎయిర్ ఏషియా తీసుకోనుంది. ఫారిన్‌ ఇన్వెస్ట్‌మెంట్‌ ప్రమోషన్‌ బోర్డు (ఎఫ్‌ఐపీబీ)కి దరఖాస్తు కూడా చేసుకున్నాయి.

కంపెనీ ఎదిగే కొద్ది మరింత మందిని ఉద్యోగంలో తీసుకుంటామని ఆయన వివరించారు. ప్రస్తుతం నిబంధనల ప్రకారం ప్రతి ఎయిర్‌ క్రాప్ట్‌కి సుమారు 20 మందిని తీసుకుంటామని ఆయన చెప్పారు. ఎయిర్‌ఏషియా కాలు మోపితే దేశంలోని చౌక విమానయాన సంస్థలకు పెద్ద దెబ్బ అని జెపీ మోర్గాన్‌ ఆసియా పసిఫిక్‌ ఈక్విటీ రీసెర్చి నివేదికలో తెలిపింది. చెన్నైకి చెందిన స్పైస్ జెట్ టైర్‌ 2, టైర్‌-3 నగరాలకు విమాన సర్వీసులు నడుపుతోంది. ఇప్పడు ఎయిర్‌ ఏషియా రంగంలోకి దిగడంతో ఈ రెండింటి మధ్య ధరల యుద్దం మొదలవుతుందని జెపీ మోర్గాన్‌ అభిప్రాయపడింది.

తెలుగు వన్ఇండియా