ముంబై: బ్రెజిల్‌కు చెందిన ఎస్ఎపి (సిస్టమ్ అనాలిసిస్ అండ్ ప్రోగ్రామింగ్) కన్సల్టింగ్ సంస్ద కాంప్లెక్స్ ఐటి లో 51 శాతం వాటాను కోనుగోలు చేయనున్నట్లు దేశీయ ఐటీ దిగ్గజ కంపెనీ మహీంద్రా సత్యం ప్రకటించింది. ఈ ఒప్పందం మొత్తం విలువ దాదాపు రూ. 124 కోట్లు (23 మిలియన్ డాలర్లు) మేర ఉండగలదని కంపెనీ పేర్కొంది. ఈ నెలాఖరు నాటికి డీల్ పూర్తి కావొచ్చని మహీంద్రా సత్యం పేర్కొంది. ముందస్తుగా మహీంద్ర సత్యం 6.5 మిలియన్ డాలర్లు నగదు కాంప్లెక్స్‌కు చెల్లిస్తుంది. మొత్తం 23 మిలియన్ డాలర్ల వరకు చెల్లించాల్సి ఉంటుంది. రానున్న 18 నెలల్లో కాంప్లెక్స్ కంపెనీ ఆదాయాన్ని పరిగణన లోకి తీసుకున్న తర్వాత ఇది నిర్ధారణ అవుతుందని టెక్ మహీంద్ర సీనియర్ వైస్ ప్రెసిడెంట్ మనోజ్ భట్ తెలిపారు.

కంపెనీ స్థూల లాభానికి ఆరు రెట్లు చెల్లించేలా డీల్ స్వరూపం ఉంటుందని తెలిపారు. టెక్ మహీంద్రకు అనుబంధ సంస్థ అయిన మహీంద్ర సత్యం, కాంప్లెక్స్ ఐటి సంయుక్తంగా బ్రెజిల్‌లో పనిచేస్తాయి. దక్షిణ అమెరికా దేశాలలోని మార్కెట్లకు అనుగుణంగా తయారీ, ఆర్థిక, కన్సూమర్ సర్వీసెస్ కంపెనీలకు కావాల్సిన సొల్యూషన్స్ అందిస్తాయని భట్ వివరించారు.

అంతర్జాతీయ శాప్ మార్కెట్‌లో బ్రెజిల్ రెండవ స్థానంలో ఉంది. ప్రస్తుతం ఐటి సంస్థలు సుమారు 36 బిలియన్ డాలర్లు సర్వీసెస్, సాఫ్ట్‌వేర్‌కు ఖర్చు చేస్తున్నాయి. దీనిలో శాప్ వాటా సుమారు 1 బిలియన్ డాలరు. దీనిలో 5 శాతం ఆదాయం మాకు లభిస్తుంది. ఐదారేళ్లలో దీనిని రెట్టింపు చేయాలని భావిస్తున్నాం. సంయుక్తంగా చేపట్టిన ఈ వ్యాపారం వల్ల అభివృద్ధి సాధిస్తామని కాంప్లెక్స్ చైర్మన్, సిఇవో ఆంటోనియా రోసి చెప్పారు.

తెలుగు వన్ఇండియా