ముంబై: ఆర్థిక మంత్రిత్వ శాఖతో చర్చించిన తర్వాత కొత్త బ్యాంకుల లైసెన్స్‌లు విషయంలో మార్గదర్శకాలను విడుదల చేస్తామని రిజర్వ్ బ్యాంక్ డిప్యూటీ గవర్నర్ ఆనంద్ సిన్హా తెలిపారు. బ్రోకరేజి, రియల్టీ సంస్థలను కూడా బ్యాంకింగ్ రంగంలోకి అనుమతించడం తదితర అంశాలపై ఆర్‌బీఐ, ఆర్థిక శాఖ ఒక అభిప్రాయానికి వచ్చాక మార్గదర్శకాలు విడుదల చేస్తామన్నారు. ఒక సమావేశానికి హాజరైన ఆయన విలేఖరులతో మాట్లాడుతూ అంతిమ మార్గదర్శకాలను రూపొందిస్తామని పేర్కొన్నారు.ఇందుకోసం ఎంత సమయం పట్టవచ్చునని ఆయనను ప్రశ్నించగా ‘త్వరలోనే' అని ఆయన అన్నారు.

గత ఏడాది ఆగస్ట్‌లో ఆర్‌బిఐ ముసాయిదా మార్గదర్శకాలను విడుదల చేసింది. రియల్‌ ఎస్టేట్‌ వ్యాపారంలో పది శాతం వాటా, ఆస్తుల విక్రయంలో బ్రోకరేజ్‌ వ్యాపారం చేసే వారికి బ్యాంకింగ్‌ రంగంలో ప్రవేశం కల్పించేది లేదని ఆ మార్గదర్శక సూత్రాలు స్పష్టం చేశాయి. కాగా ఆర్థిక మంత్రి చిదంబరం లండన్‌లో గత నెల మాట్లాడుతూ, రెండు వారాలలో బ్యాంక్ లైసెన్స్‌ల విషయమై ఆర్‌బిఐ తుది మార్గదర్శకాలు విడుదల చేస్తుందని తెలిపారు. బ్యాంకు, ప్రమోటర్‌ గ్రూప్‌ కంపెనీల మధ్య నేరుగా సంప్రదింపులు జరుగుతున్న ప్రక్రియపై కూడా ఒక అభిప్రాయానికి రావాల్సి ఉందన్నారు. 1990 ప్రాంతంలో కొత్త బ్యాంక్‌ల ఏర్పాటుకు లైసెన్స్‌లు జారీ చేసినప్పుడు 10 సంస్థలకు అవకాశం ఇవ్వగా వాటిలో ఐసిఐసిఐ, హెచ్‌డిఎఫ్‌సి, ఐడిబిఐ తదితర బ్యాంకులున్నాయి.

తెలుగు వన్ఇండియా