న్యూఢిల్లీ: ప్రస్తుత ఆర్దిక సంవత్సరంలో స్దూలదేశీయోత్పత్తి (జీడీపీ) ఈ దశాబ్దం కనిష్టానికి 5 శాతం మించకపోవచ్చునని కేంద్ర గణాంక సంస్ద (సిఎస్‌వో) నిన్న విడుదల చేసిన మందస్తు అంచనా నివేదికలో పేర్కొంది. దేశంలో ఉత్పాదక రంగం, వ్యవసాయం, సేవల రంగాలలో అభివృద్ధి ఆశాజనకంగా లేనందున వృద్ది రేటు గత పదేళ్లలో ఎన్నడూ లేని విధంగా కనిష్ఠ అంచనాగా పేర్కొంది. గత ఆర్థిక సంవత్సరం 2011-12లో జీడీపీ వృద్ది రేటు 6.2 శాతం నమోదు కాగా.. ఈ ఆర్థిక సంవత్సరం 5 శాతానికి పరిమితం కావచ్చు రిజర్వుబ్యాంకుతో పాటు పలు ఏజెన్సీల అంచనా కంటే ఇది చాలా చాలా తక్కువని సీఎస్‌ఒ పేర్కొంది. వృద్ధిరేటు అంచనాను ఏప్రిల్‌ నుంచి నవంబర్‌ కాలానికి సంబంధించిన గణాంకాలను ప్రాతిపదకగా తీసుకుంది. 2002-03 సంవత్సరంలో జిడిపి (మొత్తం దేశీయ ఉత్పత్తి) 4 శాతం ఉంది. ఆ తర్వాత నుంచి దేశీయ ఆర్థిక వృద్ధి 6 శాతం తగ్గలేదు. 2006-07 సంవత్సరంలో ఇది గరిష్ఠంగా 9.6 శాతానికి చేరింది.

సిఎస్‌వో ముందస్తు అంచనాల ప్రకారం, దేశంలో వ్యవసాయం, అనుబంధ రంగాల వృద్ధి 2012-13 సంవత్సరానికి 1.8 శాతం కాగా 2011-12 సంవత్సరంలో ఇది 3.6 శాతం ఉంది. ఉత్పాదక రంగంలో గత సంవత్సరం వృద్ధిరేటు 2.7 శాతం కాగా ఈ ఆర్థిక సంవత్సరంలో ఇది 1.9 శాతానికి తగ్గుతుందని అంచనా వేసింది. గత వారం రిజర్వ్ బ్యాంక్ ఆఫ్ ఇండియా(ఆర్‌బీఐ) నిర్వహించిన ద్రవ్య పరపతి సమీక్షలో వృద్ధిరేటు 5.5 శాతం కాగా సిఎస్‌వో వేసిన అంచనా కేవలం 5 శాతం మాత్రమే ఉంది. ఈ ఆర్థిక సంవత్సరంలో వృద్ధిరేటు 5.7-5.9 శాతం మధ్య ఉండవచ్చునని కేంద్ర ప్రభుత్వం అంచనా వేసింది. 2012-13 సంవత్సరం బడ్జెట్‌లో ప్రభుత్వం ఈ వృద్ధిరేటును 7.6 శాతంగా పేర్కొంది.

కేంద్ర గణాంక సంస్ద (సిఎస్‌వో) అంచానాలపై ఆర్థికమంత్రిత్వశాఖ స్పందించింది. ఆర్థిక వ్యవస్థను గాడిలో పెట్టేందుకు తమ వంతు కృషి చేస్తామని ఆర్థిక సంవత్సరం ముగిసే లోగా దీని కంటే మెరుగైన వృద్ధిరేటును సాధిస్తామని భరోసా ఉందని పేర్కొంది. పరిశ్రమల రంగానికే చెందిన వాణిజ్య, రవాణా రంగాలల్లో కొన్ని మార్పులు సవరణలు చేసి వృద్ధిబాట పట్టిస్తామని .. దీంతో వృద్ధిరేటు కొంత పెరిగే అవకాశం ఉంటుందని .. అయితే మొత్తానికి చూసుకుంటే తాము పరిస్థితిని గమని స్తున్నామని వృద్ధిరేటును పెంచుకునేందుకు అన్నీ చర్యలు తీసుకుంటామని ఆర్థికమంత్రిత్వశాఖ పేర్కొంది. ఇది ఇలా ఉంటే అంతర్జాతీయ ద్రవ్య నిధి (ఐఎంఎఫ్) మాత్రం దేశ ఆర్థిక వృద్ధి 5.4 శాతం ఉండవచ్చునని అంచనా వేసింది.

తెలుగు వన్ఇండియా