న్యూఢిల్లీ: ఇటీవల కేంద్ర ప్రభుత్వం ఆధార్ కార్డు ఉంటే అదనంగా గ్యాస్ సబ్సిడీ ఇస్తామన్న విషయం తెలిసిందే. గ్యాస్‌ను ఉపయోగిస్తున్న వినియోగదారులకు చాలా మందికి ఆధార్ కార్డులు లేక కష్టాలు పడుతుంటే.. ఇప్పుడు మళ్లీ కొత్తగా కేంద్ర ప్రభుత్వం ప్రావిడెంట్ ఫండ్‌కూ ఆధార్‌తో ముడిపెట్టి ఉద్యోగుల భవిష్య నిధి సంస్ద (ఈపీఎఫ్‌వో)కు ఆధార్ కార్డు వివరాలు సమర్పించాల్సిందిగా సూచించింది. కొత్త సభ్యులు తప్పనిసరిగా ఆధార్ కార్డు, బ్యాంక్ పాస్ బుక్ జిరాక్స్ కాపీ మొదలైన సంబంధిత పత్రాలను సమర్పించాల్సిందిగా పీఎఫ్, ఫ్యామిలీ పెన్షన్ సభ్యులను కోరింది. వీటిని నేరుగా ఈపీఎఫ్ ఆఫీసులో లేదా పెన్షను చెల్లించే బ్యాంకు శాఖలో గానీ ఇవ్వొచ్చని ఒక ప్రకటనలో పేర్కొంది.

ఐతే కొత్త సభ్యులు తప్పనిసరిగా ఆధార్ కార్డు ఇవ్వాలన్న ఆదేశాలకు కాస్త వెసులు బాటు కల్పించారు. ఈ ఏడాది మార్చి ఒకటో తేదినాటికి అందరికీ ఆధార్ కార్డులు జారీ అయ్యే అవకాశాలు లేకపోవడం వల్ల ఈ నిర్ణయం తీసుకున్నామని తెలిపింది. ఆధార్ కార్డు రావడానికి ఎక్కువ సమయం పట్టడంతో పాటు, ఈ పథకం 18 రాష్ట్రాల్లో మాత్రమే ఉండటం వల్ల దీన్ని వెంటనే అనుసంధానించడం కష్టమని ఈపీఎఫ్‌వో తెలిపింది.

ఉద్యోుగులు ఉద్యోగం మారిన ప్రతిసారీ కొత్త ప్రావిడెంట్ ఫండ్ (పీఎఫ్) ఖాతాలను కూడా బదలాయించుకోవాల్సిన అవసరం లేకుండా ఒకే నంబరును కేటాయించేందుకు ఆధార్‌ నెంబర్‌ను ఉపయోగంలోకి తేవాలని ఈపీఎఫ్‌వో పేర్కొంది. దీన్ని కొత్త ఖాతాలకు తప్పనిసరి చేయాలన్న ఆదేశాలపై ఉద్యోగుల నుంచి తీవ్ర వ్యతిరేకత రావడంతో ఈపీఎఫ్‌వో ఈ నిర్ణయాన్ని నిలిపివేసింది.

తెలుగు వన్ఇండియా