న్యూఢిల్లీ: యునెటైడ్ స్పిరిట్స్ వాటాదారుల నుంచి 26% వాటా కొనుగోలు చేసేందుకుగాను గ్లోబల్ లిక్కర్ దిగ్గజం డియాజియోకు మార్కెట్ నియంత్రణ సంస్ద సెబీ ఆమోదం తెలిపింది. బ్రిటన్‌కు చెందిన డియాజివో రూ.11,167 కోట్లు పెట్టుబడి పెట్టి యూనైటెడ్‌ స్పిరిట్స్‌లో మెజారిటీ వాటాలు కొనుగోలు చేసిన విషయం తెలిసిందే.. విజయ్‌మాల్యాకు చెందిన యూబీ గ్రూపునకు చెందిన యునైటెడ్‌ స్పిరిట్స్‌ లిమిటెడ్‌లో డియాజివో 53.4 శాతం వాటాను రూ. 5,441 కోట్లు పెట్టుబడితో కొనుగోలు చేసింది. మరో 26 శాతం వాటాను ప్రజలనుంచి లేదా కంపెనకి చెందిన నాన్‌ ప్రమోటర్ల నుంచి వాటాలను కొనుగోలు చేయాల్సి ఉంటుంది. గత ఏడాది నవంబర్‌ 9న ఓపెన్‌ ఆఫర్‌ ద్వారా యూఎస్‌ఎల్‌ వాటాలను కొనుగోలు చేస్తామని డియాజియో ప్రకటించిన తర్వాత ఇప్పుడు సెబి దానికి గ్రీన్ సిగ్నల్ ఇచ్చింది.

యునైటెడ్ స్పిరిట్స్‌లో 53.4 శాతం వాటాను డియాజియో కొనుగోలు చేసింది. ఈ ఒప్పంద విలువ సుమారు 2 బిలియన్ డాలర్లు. ఆర్థిక సంక్షోభంలో చిక్కుకున్న కింగ్‌ఫిషర్ ఎయిర్‌లైన్స్.. డిసెంబర్‌తో ముగిసిన మూడో త్రైమాసికంలో నష్టాలు 70 శాతం ఎగిసి రూ. 755 కోట్లుగా నమోదయ్యాయి. అంత క్రితం క్యూ3లో కంపెనీ నష్టాలు రూ. 444 కోట్లు. తాజా త్రైమాసికంలో పర్మిట్ ముగిసిపోయిన నేపథ్యంలో కింగ్‌ఫిషర్ ఫ్లయిట్ సర్వీసులు పూర్తిగా నిలిచిపోయిన సంగతి తెలిసిందే. ఈ కాలంలో కంపెనీకి ఆదాయం లేదు. కంపెనీ చివరిసారిగా 2006 అక్టోబర్-డిసెంబర్ కాలంలో రూ. 9.6 కోట్ల మేర త్రైమాసిక లాభం ఆర్జించింది.

తాజా క్యూ3లో దాదాపు రూ. 401 కోట్ల వడ్డీ చెల్లింపులు, రూ. 275 కోట్ల వన్ టైమ్ వ్యయాలు కలిసి రూ. 755 కోట్ల నష్టం వచ్చినట్లు సంస్థ తెలిపింది. కార్యకలాపాలు పునఃప్రారంభించేందుకు పౌర విమానయాన రంగ నియంత్రణ సంస్థ డీజీసీఏకి ప్రణాళిక ఇచ్చామని పేర్కొంది. కింగ్‌ఫిషర్‌కి దాదాపు రూ. 8,000 కోట్ల రుణభారం ఉండగా, దాదాపు అంతే మొత్తంలో నష్టాలు కూడా ఉన్నాయి. జీతాల బకాయిలపై పైలట్లు, ఇంజనీర్లు సమ్మెకు దిగడం, పర్మిట్ల గడువు ముగిసిపోవడం తదితర కారణాలతో అక్టోబర్ 1 నుంచి కంపెనీ విమాన సర్వీసులు పూర్తిగా నిల్చిపోయాయి.

తెలుగు వన్ఇండియా