ముంబై: మూడో త్రైమాసిక ద్రవ్య పరపతి విధాన సమీక్షను రిజర్వ్ బ్యాంక్ ఆఫ్ ఇండియా ప్రకటించింది. ఇందులో రెపోరేటును పావు శాతం తగ్గించగా.. సీఆర్‌ఆర్‌లో కూడా పావుశాతం తగ్గించింది. ఏప్రిల్, 2012 తర్వాత వడ్డీ రేట్లను తగ్గించడం ఇదే తొలిసారి. తగ్గింపు తర్వాత రెపోరేటు 7.75 శాతంగా ఉంటుంది. ఇక సీఆర్‌ఆర్ 4 శాతంగా ఉండనుంది. గృహ, వాహన రుణాల ఈఎంఐలపై వడ్డీ పావుశాతం తగ్గే అవకాశం ఉంది. దీంతో బ్యాంకులకు రూ. 18 వేల కోట్లు అందుబాటులోకి రానున్నాయి. ఇక 2012-13లో వృద్ది రేటు అంచనాను 5.8 నుండి 5.5 శాతానికి రిజర్వ్ బ్యాంక్ ఆఫ్ ఇండియా తగ్గించింది.

ఆర్‌బీఐ ప్రకటించిన ద్రవ్య పరపతి విధాన సమీక్షతో ఈరోజు నష్టాలతో ప్రారంభమైన స్టాక్ మార్కెట్లు లాభాల్లో పయనిస్తున్నాయి. కీలక వడ్డీ రేట్లు తగ్గిస్తూ రిజర్వ్ బ్యాంక్ ఆఫ్ ఇండియా తీసుకున్న నిర్ణయం మార్కెట్లలో ఉత్సాహాన్ని నింపింది. దీంతో బాంబే స్టాక్ ఎక్సేంజ్ సెన్సెక్స్ 72 పైగా లాభపడుతూ 20,175 పాయింట్ల వద్ద ట్రేడ్ అవుతుండగా.. నిప్టీ 27 పాయింట్లకు పైగా లాభాలతో కొనసాగుతూ 6,102కి సమీపంలో ట్రేడవుతోంది.

ప్రస్తుత 2012-13 ఆర్థిక సంవత్సరానికిగాను గతంలో తాము అంచనా వేసిన 5.8 శాతం జీడీపీ వృద్ధిరేటు అంచనాలు తప్పొచ్చని ఆర్‌బీఐ తన నివేదికలో పేర్కొంది. దీని కంటే దిగువకే వృద్ధి పడిపోయే అవకాశాలు ఉన్నాయని అభిప్రాయపడింది. కాగా, ఆర్‌బీఐ చేయించిన సర్వే కూడా ఈ ఏడాది వృద్ధిరేటు 5.5 శాతానికి పడిపోతుందని సోమవారం పేర్కొంది. అంతక్రితం సర్వేలో వృద్ధి 5.6 శాతంగా ఉండొచ్చని అంచనా వేసింది. ప్రభుత్వం ఇప్పటికే వృద్ధి అంచనాలను 5.7 శాతానికి కోత విధించడం తెలిసిందే. 2011-12 ఏడాదికి వృద్ధిరేటు 6.5 శాతానికి(ఇది తొమ్మిదేళ్ల కనిష్టం) పడిపోవడం తెలిసిందే.

తెలుగు వన్ఇండియా