ముంబై: కరెన్సీ డెరివేటివ్స్ ట్రేడింగ్ నిర్వహిస్తున్న ఎంసీఎక్స్ - ఎస్‌ఎక్స్ సంస్ద వచ్చే నెల నుండి పూర్తి స్దాయి స్టాక్ ఎక్సేంజ్ తరహాలో ఈక్విటీ, ఈక్విటీ డెరివేటివ్స్, బాండ్లు, వడ్డీ రేట్ల డెరివేటివ్స్ మొదలైన వాటిల్లో ట్రేడింగ్ నిర్వహించనుంది. దీనికి సంబంధించి ఫిబ్రవరి 9న ఎంసీఎక్స్ - ఎస్‌ఎక్స్ ఎక్సేంజ్ ఈక్విటీ ట్రేడింగ్ ప్లాట్ ఫాంను కేంద్ర ఆర్దిక మంత్రి పి. చిదంబరం ప్రారంభించనున్నారు. ఆ తర్వాత ఫిబ్రవరి 11 నుండి లైవ్ ట్రేడింగ్ ప్రారంభమవుతుందని ఎంసీఎక్స్ - ఎస్‌ఎక్స్ సంస్ద ఒక ప్రకటనలో తెలిపింది. దీంతో దేశీయ స్టాక్ ఎక్సేంజ్‌లైన బీఎస్‌ఈ, ఎన్‌ఎస్‌ఈలతో పోటీపడేందుకు ఎంసీఎక్స్-ఎస్‌ఎక్స్‌కి మార్గం సుగమమైంది.

దీనితోపాటు ఫిబ్రవరి 9వ తారీఖున కొత్త ఇన్వెస్టర్లను స్టాక్‌మార్కెట్ల వైపు ఆకర్షించేందుకు ఉద్దేశించిన రాజీవ్ గాంధీ ఈక్విటీ సేవింగ్స్ స్కీము (ఆర్‌జీఈఎస్‌ఎస్)ని కూడా ఆర్దిక మంత్రి పి. చిదంబరం ప్రారంభించనున్నారు. తొలిసారి స్టాక్‌మార్కెట్లోకి అడుగుపెట్టే ఇన్వెస్టర్లను ఆకర్షించడం కోసం పన్ను ప్రయోజనాలను కల్పిస్తూ... కేంద్ర ప్రభుత్వం ఈ స్కీమ్‌ను ప్రతిపాదించింది. 2012-13 ఏడాది బడ్జెట్‌లో అప్పటి ఆర్థిక మంత్రి ప్రణబ్ ముఖర్జీ ఈ స్కీమ్‌ను ప్రకటించారు.

ఈ స్కీమ్ ద్వారా రూ.10 లక్షల లోపు వార్షిక ఆదాయం కలిగి... తొలిసారి స్టాక్‌మార్కెట్లో పెట్టుబడులు పెట్టేవారికి సంబంధిత మొత్తంపై పన్ను ఆదాయం నుంచి మినహాయింపు లభిస్తుంది. ఐతే, పెట్టుబడి పరిమితి రూ. 50 వేలకు మించకూడదు. మార్కెట్ నియంత్రణ సంస్థ సెబీ విడుదల చేసిన నోటిఫికేషన్ ప్రకారం ఈ స్కీమ్ కింద చేసే ఇన్వెస్ట్‌మెంట్‌కు ఏడాది పాటు లాక్-ఇన్ వ్యవధి ఉంటుంది. అంటే ఈ స్కీమ్ ద్వారా కొనుగోలు చేసిన స్టాక్స్, మ్యూచువల్ ఫండ్స్‌ను సంవత్సరం తర్వాతే విక్రయించవచ్చు.

తెలుగు వన్ఇండియా