సింగపూర్: విదేశీ పెట్టుబడులను ఆకర్షించే చర్యల్లో భాగంగా తూర్పు ఆసియా దేశాల్లో పర్యటిస్తున్న ఆర్దిక మంత్రి పి. చిదంబరం మాట్లాడుతూ సంపన్నులపై భారీ స్దాయిలో పన్నులు విధించాలన్న ప్రతిపాదనకు తాను వ్యతిరేకం కాదని అన్నారు. ఆర్థిక వ్యవస్థ, ప్రభుత్వ అవసరాలకోసం అవసరమైతే సంపన్నులు అధిక పన్నులను చెల్లించేందుకు ముందుకురావాలని పిలుపునిచ్చారు. ఎక్కువ సంపద కలిగిన సంపన్నులపై కాస్త అధిక పన్నుల విధింపు అంశాన్ని పరిశీలిస్తున్నామని అన్నారు. ఇది కేవలం తాను వింటున్న వినిపిస్తున్న వాదన మాత్రమే తప్ప ఇది తన అభిప్రాయం కాదని ఆయన వివరణ ఇచ్చారు.

ప్రస్తుతం అమలులో వున్న పన్ను రేట్లు 1997లో తానే సమర్పించిన బడ్జెట్‌లో రూపొందించిన పన్ను రేట్లు తరువాత నాలుగు ప్రభుత్వాలు, నలుగురు ఆర్థిక మంత్రులు మారినా అదే స్థాయిలో వున్నాయన్నారు. స్థిరమైన పన్ను రేట్లను తాను విశ్వసిస్తానని చెప్పారు. వచ్చే నెల 28న తాను బడ్జెట్‌ ప్రవేశపెట్టే సమయానికి ద్రవ్యలోటును ప్రభుత్వం 5.3 శాతం లోపు వుంచగలగటంతో పాటు, వచ్చే బడ్జెట్‌లో దానిని 4.8 శాతానికి తగ్గించేందుకు హామీ ఇస్తే అప్పుడు వచ్చే ఏడాది ఆర్థిక వ్యవస్థ బాగుంటుందన్నారు.

దేశంలోని సంపన్నులపై పెద్ద మొత్తంలో పన్నులు వసూలు చేయడం అనేది మంచిపనే అయినప్పటికీ.... ఫ్రీ-బ్రడ్జెట్‌కు ముందు చిదంబరం ఆర్థికవేత్తలతో జరిపే సంప్రదింపుల్లో జరిపినప్నుడు ఈ ప్రతిపాదనను వారు తీవ్రంగా వ్యతిరేకించారు. రెవెన్యూను పెంచుకోవాలంటే పన్నుల పరిధిని మరింత పెంచుకోవాలి కానీ.. సంపన్నులపై పెద్ద ఎత్తున పన్నుల విధించడం అనేది సరైన పద్దతి కాదేమోనని వారు ఆర్థికమంత్రికి సూచించారు.

ప్రధానమంత్రి ఆర్థిక సలహామండలి చైర్మన్‌ సీ రంగరాజన్‌ మాత్రం దేశంలోని అత్యధిక సంపన్నులపై పన్నుల భారం మోపి స్థూలదేశీయోత్పత్తి (జీడీపీ)లో పన్ను నిష్పత్తిని పెంచుకోవాలని సూచించారు. ఆర్థికవేత్తల అభిప్రాయం ప్రకారం సంపన్నులు పన్నులు చెల్లించే విషయానికి వస్తే జనాభాలో అతి తక్కువ మంది ఉంటారు. వారి నుంచి ఎక్కువ పన్నులు వసూలు చేసి ఆర్థిక పరిస్థితిని చక్కదిద్దలేమని ఆర్థిక వేత్తలు తమ అభిప్రాయాన్ని వెలిబుచ్చారు. దేశంలో పన్నులు కట్టేవారి సంఖ్య సుమారు 35 మిలియన్‌లు.

వచ్చే నెలలో ప్రవేశపెట్టే 2013-14 ఆర్థిక సంవత్సర బడ్జెట్‌పైనా చిదంబరం మాట్లాడారు. వచ్చే నెలలో తాను ప్రవేశపెట్టనున్న బడ్జెట్‌ ప్రతిపాదనలను ఆయన ప్రస్తావిస్తూ బడ్జెట్‌ను ఎన్నికలను దృష్టిలో పెట్టుకుని రూపొందించటం లేదన్నారు. ఎన్నికలు ఇంకా 14 నెలల దూరంలో వున్నాయని, వచ్చే ఏడాది బడ్జెట్‌ బాధ్యతాయుతమైన బడ్జెట్‌గా వుంటుందని ఆయన వివరించారు. తాజాగా వరల్డ్ ఎకనమిక్ ఫోరమ్ సమావేశాల్లో విప్రో అజీమ్ ప్రేమ్‌జీ దీనికి మద్దతిచ్చిన విషయం తెలిసిందే. ఐతే ఇది ఎంతవరకూ కార్యరూపం దాల్చుతుందనేది అనుమానమేనంటూ ప్రేమ్‌జీ తెలిపారు.

తెలుగు వన్ఇండియా