విప్రో నికర లాభం రూ. 1,716 కోట్లు, 50 కొత్త క్లయింట్లు

ముంబై: దేశీయ మూడో అతి పెద్ద ఐటీ దిగ్గజం విప్రో నికర లాభం ప్రస్తుత ఆర్థిక సంవత్సరం మూడో త్రైమాసికంలో 18 శాతం వృద్ధితో రూ. 1,716.4 కోట్లు ఆర్జించింది. ఆదాయం కూడా 10 శాతం పెరిగి రూ. 10,989 కోట్లకు చేరింది. గత గత సంవత్సరం ఇదే త్రైమాసికంలో 1,456.4 కోట్ల రూపాయలు సాధించింది. కంపెనీకి అక్టోబర్-డిసెంబర్ త్రైమాసికంలో ఏకీకృత మొత్తం ఆదాయం రూ. 10,989.1 కోట్లు. గత సంవత్సరం ఇదే త్రైమాసికంలో కంపెనీ 9,965.1 కోటి రూపాయలు ఆదాయం ఆర్జించింది. మొత్తం ఆదాయంలో ఐటి సేవల నుంచి కంపెనీకి 78 శాతం అదాయం లభిస్తుండగా ఈ త్రైమాసికంలో 1.577 బిలియన్ డాలర్ల సాధించినట్లు క్యూ 3 ఆర్దిక ఫలితాల ప్రకటన సందర్బంగా తెలిపింది.

దేశం మొత్తం మీద ఆర్థిక వృద్ధిపై అంచనాలు ఓ మోస్తరుగానే ఉంటున్నప్పటికీ.. అంతర్జాతీయంగా కూడా పలు కార్పొరేట్ సంస్థలు ఉత్పత్తి, ఆదాయాలలో ఆచి తూచి వ్యవహరిస్తున్నాయని విప్రో చైర్మన్ అజీం ప్రేమ్‌జీ తెలిపారు. నాలుగో త్రైమాసికంలో ఐటీ సర్వీసుల విభాగం ఆదాయం 1.585 -1.625 బిలియన్ డాలర్ల స్థాయిలో ఉండొచ్చని అంచనా వేస్తున్నట్లు వివరించారు. వినియోగదారులకు సేవలు అందించేందుకు వ్యూహాత్మక రీతిలో పెట్టుబడులు పెట్టడమే కాక సంస్థాపరంగా, సాంకేతికపరంగా వృద్ధి చేస్తూనే ఉంటామని విప్రో ఐటి బిజినెస్ ఎగ్జిక్యుటివ్ డైరెక్టర్, సిఇవో టికె కురియన్ చెప్పారు.

డిసెంబర్ నాటికి ఐటి సేవల విభాగంలో కంపెనీ 1,42,905 మంది ఉద్యోగులుండగా ఈ త్రైమాసికంలో 2,336 మంది కొత్తగా చేరారని అన్నారు. గత త్రైమాసికంతో పోలిస్తే నిర్వహణ మార్జిన్లు మెరుగుపడ్డాయని విప్రో ఈడీ సురేష్ సేనాపతి చెప్పారు. విభాగాల వారీగా చూస్తే ఐటీ ప్రోడక్టుల ఆదాయం 11% పెరిగి రూ. 997 కోట్లకు చేరగా, కన్జూమర్ కేర్, లైటింగ్ వ్యాపార విభాగం ఆదాయం 17% పెరిగి రూ. 1,028 కోట్లకు చేరింది. దీంతో ప్రముఖ ఐటి కంపెనీ విప్రో ప్రతి షేర్‌పై రూ.2 మధ్యంతర డివిడెండ్‌ చెల్లించాలని నిర్ణయించింది.

తెలుగు వన్ఇండియా