ముంబై: రిజర్వ్ బ్యాంక్ ఆఫ్ ఇండియా (ఆర్‌బీఐ)ను ప్రపంచంలోని ఇతర కేంద్ర బ్యాంకులకు రోల్‌మోడల్‌గా నిలపాలని గవర్నర్ దువ్వూరి సుబ్బారావు లక్ష్యంగా పెట్టుకున్నారు. ఇదే విషయాన్ని ఆయన తన సహచరులకు పంపించిన నూతన సంవత్సర సందేశంలో వెల్లడించారు. ఆర్‌బీఐ గవర్నర్‌గా బాధ్యతలు చేపట్టిన తొలినాళ్లలో ఆ సంస్థ కార్యకలాపాల నిర్వహణ గురించి పెద్దగా తెలియదని తనకుతాను ప్రకటించుకున్న దువ్వూరి.... ఆర్‌బీఐ అంటే బయటి వ్యక్తికి ఒక బ్లాక్ బాక్స్ లాంటింది. అందులో ఏమున్నదీ అతడికి తెలియదు. ఆర్‌బీఐలో పని చేసే వాళ్లు ముఖ్యమైన విధులే నిర్వర్తిస్తారన్న సంగతే ప్రజలకు తెలుసు గానీ.. తమ జీవితాలతో ఆర్‌బీఐకి ఉన్న సంబంధం ఏమిటనేది వారు తెలుసుకోలేక పోతున్నారని అన్నారు.

ఆర్‌బీఐ నిర్వహించే కార్యకలాపాలు ఎంత కీలకమైనవనే విషయం పట్ల అందరిలో అవగాహన కల్పించాలని అన్నారు. స్వయంప్రతిపత్తిని ఇచ్చారంటే జవాబుదారుతనాన్ని అశిస్తున్నారని అర్దం. తద్వారా బ్యాంకింగ్ రెగ్యులేటర్ కార్యకలాపాల్లో పారదర్శకతను, జవాబుదారీతనాన్ని పెంపొందింపచేయాలని అన్నారు. మన విధానాలను వివరించి, వాటిని సమర్దించుకోగలగాలి. అవసరమైనచోట మనకు లభించే స్పందనల నుండి పాఠాలు కూడా నేర్చుకోవాలని దువ్వూరి పేర్కొన్నారు. రాబోయే కాలంలో ప్రపంచ బ్యాంకుల కార్యకలాపాలకు ఒక రోల్ మోడల్‌గా ఆర్‌బీఐ ఆవిర్భవిస్తుందన్నదని దువ్వూరి అన్నారు.

ఇక దువ్వూరి విషయానికి వస్తే 2008లో రిజర్వ్‌బ్యాంక్ ఆఫ్ ఇండియా గవర్నర్‌గా పదవీ బాధ్యతలు చేపట్టారు. రిజర్వ్‌బ్యాంక్ ఆఫ్ ఇండియాలో చేరక ముందు ఆర్దిక శాఖలో కార్యదర్శిగా ఉన్నారు. అంతేకాకుండా ప్రపంచ ఆర్దిక వేత్తల్లో ఒకరుగా తన సేవలందించారు. సివిల్ సర్వీసెస్‌ను ఎంచుకున్న మొదటితరం ఐఐటీ పట్టభద్రుల్లో దువ్వూరి సుబ్బారావు ఒకరు. తొలి మూడు సంవత్సరాలకు రిజర్వ్ బ్యాంక్ ఆఫ్ ఇండియా గవర్నర్‌గా దువ్వూరిని నియమించి ఆ తర్వాత రెండు సంవత్సరాలకు పొడిగించారు.

తెలుగు వన్ఇండియా