న్యూఢిల్లీ: కొత్త బ్యాంకులు ప్రారంభించేందుకు గాను రిజర్వ్ బ్యాంక్ ఆఫ్ ఇండియా (ఆర్‌బీఐ) వచ్చే 4-6 వారాల వ్యవధిలో తుది మార్గదర్శకాలు విడుదల చేయనుంది. దీనికి సంబంధించిన ప్రక్రియ మొదలైందని, ఆర్‌బీఐ గతంలో విడుదల చేసిన ముసాయిదా మార్గదర్శకాలపై ప్రస్తుతం ఆర్థిక శాఖ తన అభిప్రాయాలను పంపే ప్రక్రియలో ఉందని, తదనంతరం తుది మార్గదర్శకాలను ప్రకటించాల్సి ఉంటుందని తెలిపింది. ఇప్పటికే దేశంలోని కార్పొరేట్‌ దిగ్గజాలు రిలయన్స్‌, రేలిగేర్‌, ఎల్‌ అండ్‌ టి సంస్దలు తమ ప్రయత్నాలను ముమ్మరం చేశాయి.

కార్పొరేట్లతో పాటు విభిన్న పక్షాల నుంచి సేకరించిన అభిప్రాయాలను క్రోఢీకరించే ప్రక్రియలో ఆర్థిక మంత్రిత్వశాఖ తన అభిప్రాయాలను ఆర్‌బీఐకి పంపే పనిలో ఉంది. ఇదిలా ఉంటే, ఆర్‌బీఐ డిప్యూటీ గవర్నర్ ఆనంద్ సిన్హా వచ్చే నెలలో పదవీ విరమణ చేయనున్నారు. బ్యాంకింగ్ కార్యకలాపాలు, అభివృద్ధి విభాగానికి ప్రస్తుతం ఆయన ఇన్‌చార్జ్‌గా వ్యవహరిస్తున్న నేపథ్యంలో... ఆయన రిటైర్ కావడానికి ముందే కొత్త బ్యాంకింగ్ లెసైన్స్‌ల నిబంధనలను ఖరారు చేయాల్సి ఉంటుందని కూడా సంబంధిత వర్గాలు చెబుతున్నాయి. ఇటీవలే పార్లమెంట్‌లో బ్యాంకింగ్ చట్టాల సవరణ బిల్లు-2011కు ఆమోదముద్ర వేయడంతో కొత్త లెసైన్స్‌ల జారీని వేగవంతం చేయాలని ఆర్థిక మంత్రి చిదంబరం సూచించిన సంగతి తెలిసిందే.

కొత్త బ్యాంకుల కోసం లైసెన్సుల జారీ విషయంలో నాన్-కార్పొరేట్ రంగానికీ రిజర్వ్ బ్యాంక్ ప్రాధాన్యత ఇవ్వాల్సిన అవసరం ఉందని ప్రధానమంత్రి ఆర్థిక సలహాదారు మండలి(పిఎమ్‌ఇఎసి) చైర్మన్ సి రంగరాజన్ అభిప్రాయపడ్డారు. నాన్ కార్పొరేట్ వ్యాపారులకు అవకాశం ఇవ్వడం రిజర్వ్ బ్యాంక్‌కి సాధ్యమేనని, వారి వ్యాపార కార్యకలాపాలను పరిశీలించి ఆ తర్వాత బ్యాంకింగ్ కార్యకలాపాలకు వారు సమర్థనీయమని భావిస్తే, అందిరితోపాటు వారికి లైసెన్సుల మంజూరులో ప్రాధాన్యత ఇవ్వాలని అన్నారు. మార్గదర్శకాల ప్రకారం వాణిజ్య బ్యాంకుల ఏర్పాటుకు కొత్త లైసెన్సుల కోసం సమర్దనీయమైన కార్యకలాపాల ట్రాక్ రికార్డుతోపాటు కనీసం 500 కోట్ల రూపాయల మూలధనాన్ని కలిగి ఉండాల్సి ఉంది.

తెలుగు వన్ఇండియా