బెంగుళూరు: ఆర్దిక ఇబ్బందుల్లో సతమవుతున్న కింగ్‌ఫిషర్ ఎయిర్‌లైన్స్ పునరుద్దరణ ప్రణాళికను రుణాలిచ్చిన స్టేట్ బ్యాంక్ ఆఫ్ ఇండియా ఆధ్వర్యంలోని బ్యాంకుల కనార్షియం వ్యతిరేకించినట్లు సమాచారం. గత నెలలో డైరెక్టరేట్ జనరల్ ఆఫ్ సివిల్ ఏవియేషన్(డీజీసీఏ)కు సమర్పించిన పునరుద్దరణ ప్రణాళిక మాదిరే ఈ ప్రణాళిక కూడా ఉందని, ఇది ఏమాత్రం ఆమోదయోగ్యంగా లేదని కనార్షియంలోని బ్యాంకులు తమ అభిప్రాయాలను తెలిపాయి. ఇంతకంటే మెరుగైన ప్రణాళికను తీర్చిదిద్దాలని కింగ్‌ఫిషర్ ఎయిర్‌లైన్స్ యాజమాన్యానికి సూచించాయి.

కింగ్‌ఫిషర్‌కు, బ్యాంకులకు శుక్రవారం జరిగిన సమావేశంలో ఈ పునరుద్దరణపై ఒక అంకీకారానికి రాలేకపోయాయి. ప్రణాళికలో భాగంగా వచ్చే ఏడాది కాలంలో రూ. 650 కోట్లను పెట్టుబడి పెట్టేందుకు కంపెనీ సంసిద్ధతను వ్యక్తం చేసింది. అయితే, దీన్ని వ్యతిరేకించిన రుణదాతలు మరింత సమర్థ ప్రణాళిక కోసం ఈ నెల 18లోగా కంపెనీతో మరోసారి సమావేశంకానున్నట్లు తెలుస్తోంది.

ఇది ఇలా ఉంటే రుణదాతలు, విమానాశ్రయ నిర్వాహకులతో సంప్రదించిన తర్వాతే లైసెన్సును పునరుద్దరణకు కింగ్‌ఫిషర్ ఎయిర్‌లైన్స్ చేసుకున్న దరఖాస్తును పరిశీలిస్తామని ఇప్పటికే డీజీసీఏ స్పష్టం చేసిన విషయం తెలిసిందే.

తెలుగు వన్ఇండియా