న్యూఢిల్లీ: సత్యం కంప్యూటర్స్ మాజీ డైరెక్టర్లపై అమెరికాలో నమోదైన కుంభకోణం కేసులో విషయంలో ఊరట లభించింది. వారిపై దాఖలైన క్లాస్ యాక్షన్ దావాను సదరన్ డిస్టిక్ట్ ఆఫ్ న్యూయార్క్ కోర్టు కొట్టివేసింది. ఈ కేసులో ఏడుగురు మాజీ డైరెక్టర్లు అక్రమాలకు పాల్పడ్డారనే అభియోగం నిరూపితం కాలేదని యుఎస్ డిస్ట్రిక్ట్ జడ్జ్ బార్బరా జోన్స్ పేర్కొన్నారు. తమపై దాఖలైన కేసును కొట్టివేయాలంటూ డెరైక్టర్లు దాఖలు చేసిన పిటిషన్‌కి అనుకూలంగా జడ్జి బార్బరా జోన్స్ ఈ మేరకు 71 పేజీల తీర్పు వెలువరించారు. కాగా, తాజా తీర్పును మాజీ డైరెక్టర్లలోని ఐదుగురుకి చెందిన న్యాయవాది ఇర్విన్ వారెన్ స్వాగతించారు.

కుంభకోణం వల్ల వారు ఏదో రకంగా ప్రయోజనం పొందినట్లు పటిష్టమైన రుజువులు చూపాల్సి ఉంటుందని న్యాయమూర్తి తెలిపారు. అయితే, పిటిషనర్లు దాఖలు చేసిన ఫిర్యాదులో డెరైక్టర్లు వ్యక్తిగతంగా లాభపడ్డారని చెప్పేందుకు ఆధారాలేమీ లేవని ఆమె పేర్కొన్నారు. ఇందులోని ఆరోపణలన్నీ ఎవరికీ అనుమానం రాని విధంగా మోసానికి పాల్పడ్డట్లు సూచిస్తున్నాయని, ఒక రకంగా ప్రతివాదులైన డెరైక్టర్లు కూడా ఈ మోసంలో బాధితులే అనుకోవడానికి అవకాశం ఉందని న్యాయమూర్తి అభిప్రాయపడ్డారు.

కేసు ఎదుర్కొన్న ఏడుగురు మాజీ డెరైక్టర్లలో హార్వర్డ్ బిజినెస్ స్కూల్ ప్రొఫెసర్ కృష్ణ పాలెపు, ఇండియన్ స్కూల్ ఆఫ్ బిజినెస్ మాజీ డీన్ ఎం రామ్మోహన్ రావు, మాజీ కేబినెట్ కార్యదర్శి టీఆర్ ప్రసాద్, ఇండియన్ ఇనిస్టిట్యూట్ ఆఫ్ టెక్నాలజీ మాజీ డెరైక్టర్ వీఎస్ రాజు ఉన్నారు. ఇక వివరాల్లోకి వెళితే 2004 జనవరి-2009 జనవరి మధ్యకాలంలో ఎన్‌ఎస్‌ఈ, బీఎస్‌ఈలలో సత్యం షేర్లు కొన్న అమెరికన్ సంస్థలు ఈ కేసు వేశాయి. సత్యం కుంభకోణం బయటపడిన నేపథ్యంలో 2009 నుంచి ఆ సంస్థ వాటాదారులు నష్టపరిహారం కేసులను వేయడం మొదలుపెట్టారు. రామలింగరాజు నేతృత్వంలోని సత్యం కంప్యూటర్స్ కుంభకోణం భారత్‌లో భారీ కార్పొరేట్ కుంభకోణంగా నిలిచిన విషయం తెలిసిందే.

తెలుగు వన్ఇండియా