న్యూఢిల్లీ: రీటైల్ ద్రవ్యోల్బణం నవంబర్ నెలలో 9.90 శాతంగా నమోదైందని వినియోగదారుల సూచీ (CPI) పేర్కొంది. వివరాల్లోకి వెళితే రీటైల్ ద్రవ్యోల్బణం పెరగడానికి కారణం ఆహార పదార్థాల ధరలు ముఖ్యంగా పంచదార, వంటనూనెలు, బట్టలు ధరలు పెరగడమేనని తెలిపింది. ఇక అక్టోబర్ నెలలో ద్రవ్యోల్బణం 9.73 శాతంగా నమోదైంది. నవంబర్‌లో అత్యధికంగా పెరిగింది వంటనూనెలతో పాట కొవ్వు ఉత్పత్తులు పెరిగాయి. సంవత్సరం ప్రాతిపదికన చూసుకుంటే 17.67 శాతం పెరిగింది.

చక్కెర 16.97 శాతం, కాయధాన్యాలు 14.19 శాతం పెరిగాయి. ఇక కూరగాయల విషయానికి వస్తే 14.74 శాతం పెరిగాయి. మాంసం, చేపలు, గుడ్లు, 11.33 శాతం పెరిగాయి. అలాగే నవంబర్‌లో బట్టలు, ఫుట్‌వేర్‌ కూడా 11.08 శాతం పెరిగాయి. ఇక పట్టణ ప్రాంతాల్లో రీటెయిల్‌ ద్రవ్యోల్బణం 9.69 శాతానికి చేరగా... అక్టోబర్ నెల్లో 9.46 శాతంగా నమోదైంది. గ్రామీణ ప్రాంతాల్లో ద్రవ్యోల్బణం అక్టోబర్‌తో పోల్చితే 9.97 శాతంగా నమోదు కాగా.. అక్టోబర్‌లో 9.98 శాతంగా నమోదైంది.

రీటైల్ ద్రవ్యోల్బణం రెండంకెలకు చేరుకోవడంతో రిజర్వ్ బ్యాంక్ ఆఫ్ ఇండియా డిసెంబర్ 18న జరగనున్న ద్రవ్యపరపతి విధాన సమీక్షా సమావేశంలో కీలక వడ్డీరేట్లు తగ్గించే అవకాశం లేదని ఆర్థికవేత్తలు భావిస్తున్నారు. టోకు ధరల ఆధారిత సూచి అక్టోబర్‌లో 7.45 శాతంగా నమోదైంది. ఆర్‌బీఐ అంచనా ప్రకారం ద్రవ్యోల్బణం 5- 6 శాతం వరకు నమోదైతేనే వడ్డీరేట్లు తగ్గించే అవకాశం ఉందని ఆర్‌బీఐ గత కొన్ని రోజుల నుండి వాదిస్తున్న విషయం తెలిసిందే.

తెలుగు వన్ఇండియా