రాబోయేకాలంలో అన్ని పది రూపాయల నోట్లను తీసివేసి వాటి స్దానంలో నాణేలను రిజర్వ్ బ్యాంక్ ఆఫ్ ఇండియా ప్రవేశపెట్టనున్నట్లు ఆర్దికశాఖ సహాయ మంత్రి నమో నారాయణ్ మీనా లోకసభలో నిన్న ఓ లిఖితపూర్వక సమాధానంలో తెలిపారు. ఐతే మనదేశంలో 2009 నుండి పది రూపాయల నాణేలు పాక్షికంగా చెలామణిలో ఉన్నాయి. ఐతే పది రూపాయల నాణేల సరఫరా దేశంలోని మింట్‌ల సామర్థ్యంపై ఆధారపడి వుంటుందని అన్నారు.

పది రూపాయల నోటు సగటు లైఫ్ కేవలం 9 నుంచి 10 నెలలు మాత్రమే కాగా, ఒక్కో పది నోటు ప్రింటింగ్ కోసం 96 పైసలు ఖర్చు అవుతుందని రిజర్వ్ బ్యాంక్ ఆఫ్ ఇండియా తెలిపిందని ఆర్దిక మంత్రి తెలిపారు. పది రూపాయల నాణెం తయారీకి ఒక్కోదానికి రూ.6.10 ఖర్చు అవుతుందన్నారు. అయినప్పటికీ పది నోట్ల లైఫ్ వ్యవధి తక్కువ కావడం వల్ల నోట్ల ప్రింటింగ్ ఖర్చే ఎక్కువని అన్నారు.

ఇక ఆర్థికమంత్రి చిదంబరం లోకసభలో ఒక ప్రశ్నకు సమాధానంగా కరెన్సీ నోట్ల ముద్రణలో మనదేశం స్వయం సమృద్ధి సాధించిందని.. దేశంలో మొత్తం అవసరాలకి వివిధ డినామినేషన్లలో సుమారు 17,600 మిలియన్ బ్యాంక్ నోట్ల ముద్రణ జరుగుతుందన్నారు. ఈ ముద్రణ మనదేశంలోనే నాలుగు ప్రెస్సుల ఆధ్వర్యంలో జరుగుతోందని మంత్రి తెలియజేశారు.

తెలుగు వన్ఇండియా