ముంబై: శుక్రవారం హిందూస్దాన్ కాపర్ డిజిన్వెస్ట్‌మెంట్లో భాగంగా ప్రభుత్వం చేపట్టిన 4 శాతం వాటా విక్రయం సక్సెస్ అయింది. హిందూస్దాన్ కాపర్ కంపెనీలో ప్రస్తుతం ప్రభుత్వానికి ఉన్న 99.59 శాతంలో తొలిదశలో భాగంగా 4 శాతం వాటాని విక్రయానికి పెట్టి షేరుకి కనీస ధరని రూ. 155గా ప్రభుత్వం ప్రకటించిన విషయం తెలిసిందే. దీనికి గాను ఇన్వెస్టర్ల నుండి రూ. 156.56 సగటు ధరలో రూ. 808 కోట్ల విలువైన బిడ్స్ దాఖలయ్యాయి. దీనిని బట్టి అమ్మకానికి పెట్టిన 3.7 కోట్ల షేర్లకుగాను (4 శాతం వాటా), 5.16 కోట్ల షేర్లకుపైగా డిమాండ్ లభించింది.

దీంతో ముందుగా డిమాండ్ అదనంగా ఉంటే 5.59 శాతం వాటా (గ్రీన్‌షూ ఆప్షన్)లో 1.58 శాతం వాటాను కూడా ప్రభుత్వం విక్రయించడం విశేషం. దీంతో మొత్తం 5.58 శాతం వాటాను అమ్మింది. ఓపక్క డిజిన్వెస్ట్‌మెంట్లో వాటా విక్రయం సూపర్‌హిట్ ఐతే.. మరోపక్క స్టాక్ మార్కెట్‌లో ఈ కంపెనీ షేరు ధర 20% పడిపోయంది. శుక్రవారం నాటి ట్రేడింగ్‌లో ఈ కంపెనీ షేరు భారీగా క్షీణిస్తూ ఒకదశలో లోయర్ సర్క్యూ ట్ పరిధికి చేరింది. మార్కెట్ ధర కంటే 41% డిస్కౌంట్‌తో ప్రభుత్వం ఈ సంస్థలో నాలుగు శాతం వాటాను విక్రయంచింది. కంపెనీ షేరు పతనం వల్ల సంస్థ మార్కెట్ క్యాపిటలైజేషన్ ఏకంగా రూ.5వేల కోట్లు తగ్గిపోయంది. ఫలితంగా కంపెనీ మార్కెట్ క్యాప్ రూ. 19,711 కోట్లకు పరిమితమైంది.

హిందుస్తాన్ కాపర్ వాటా కొనుగోలుకి దాఖలైన అత్యధిక శాతం బిడ్స్‌ను ప్రభుత్వరంగ దిగ్గజాలు ఎల్‌ఐసీ, ఎస్‌బీఐ, పీఎన్‌బీ తదితరాలు దాఖలు చేశాయి. ఈ ఆఫర్ తరువాత కంపెనీలో ప్రభుత్వ వాటా 94%కు పరిమితమైంది. ఇక బిడ్డింగ్‌లో పాల్గొన్న మిగతా సంస్థాగత ఇన్వెస్టర్ల వివరాలు సోమవారానికి వెల్లడవుతాయని డిజిన్వెస్ట్‌మెంట్ కార్యదర్శి హలీమ్ ఖాన్ చెప్పారు.

ఇది ఇలా ఉంటే హిందుస్తాన్ కాపర్‌లో 4% ప్రభుత్వ వాటాల ఉపసంహరణను విజయవంతంగా చేపట్టిన నేపథ్యంలో ఆర్థిక మంత్రి పి.చిదంబరం ఈ ఏడాది డిజిన్వెస్ట్‌మెంట్ లక్ష్యాన్ని సాధించగలమన్న ధీమాను వ్యక్తం చేశారు. డిజిన్వెస్ట్‌మెంట్‌లో భాగంగా ప్రభుత్వం ప్రస్తుత ఆర్థిక సంవత్సరంలో రూ. 30,000 కోట్లను సమీకరించాలని లక్ష్యంగా పెట్టుకుంది. హిందుస్తాన్ కాపర్ వాటా విక్రయానికి పూర్తిస్థాయిలో బిడ్స్ లభించడం సంతోషంగా ఉందని ఆర్దిక మంత్రి చిదంబరం అన్నారు.

తెలుగు వన్ఇండియా