న్యూఢిల్లీ: గ్లోబల్ సర్వీసెస్ ట్రేడ్‌లో ఎక్కువ వాటా కలిగిన దేశాల్లో ఇండియా ఏడవ స్దానంలో ఉన్నట్లు ప్రపంచ వాణిజ్య సంస్ద (డబ్ల్యుటిఓ) ప్రకటించంది. గత ఏడాదిలో ఇండియా సేవల రంగంలో సుమారు 261 బిలియన్ డాలర్ల విలువైన ఎగుమతులు, దిగుమతులను నిర్వహించినట్లు ప్రపంచ వాణిజ్య సంస్ద తన నివేదికలో పేర్కొంది. ఇందులో 137 బిలియన్ డాలర్ల విలువైన ఎగుమతులు, 124 బిలియన్ డాలర్ల విలువైన దిగుమతులు జరిపిన భారత్, 2011 సంవత్సరం చివరి నాటికి వాణిజ్య సేవల్లో మిగులు సాధించిన టాప్ ఐదు దేశాల సరసన నిలిచిందని నివేదికలో పేర్కొంది.

దేశ స్దూల జాతీయోత్పత్తి (జీడీపి)లో సేవల రంగం సుమారు 55 శాతానికి పైగా వాటాను కలిగి ఉంది. ప్రపంచ వ్యాప్తంగా వాణిజ్య సర్వీసులో గ్లోబల్ పవర్ హౌస్‌గా పేరున్న అమెరికా తన పేరుని నిలబెట్టుకుంటూ గత ఏడాది చివరికి 395 బిలియన్ డాలర్ల విలువైన దిగుమతులు, 581 బిలియన్ డాలర్ల విలువైన ఎగుమతులు జరిపినట్లు నివేదికలో తెలిపింది. రెండవ స్దానంలో ఉన్న జర్మనీ సేవల ఎగుమతుల కన్నా దిగుమతులు అధికస్దాయిలో ఉండి 36 బిలియన్ డాలర్ల లోటుకు దారితీసింది.

గత ఏడాది జర్మనీ జరిపిన సేవల ఎగుమతులు 253 బిలియన్ డాలర్లు కాగా, ఈ ఏడాది 289 బిలియన్ డాలర్ల విలువైన దిగుమతులు చేసుకుంది. అలాగే వాణిజ్య ఎగుమతుల రంగంలో ఎక్కువ మిగులు కలిగి ఉండే చైనా సర్వీసుల్లో మాత్రం ఎగుమతుల కన్నా 54 బిలియన్ డాలర్ల విలువైన ఎక్కువ దిగుమతులు జరిపింది. ఇది ఇలా ఉంటే భారతదేశ ఆర్థిక రంగంలో సర్వీసుల రంగం ఎంతో కీలకమైన విషయం తెలిసిందే.

తెలుగు వన్ఇండియా