ముంబై: విజయ్ మాల్యాకు చెందిన యునైటెడ్ స్ప్రింట్స్ షేర్లు 52 వారాల తర్వాత 6 శాతం పైకి ఎగబాకాయి. దీనికి కారణం యునైటెడ్ స్పిరిట్స్ - డియాజియో మధ్య ఒప్పందం కుదరడమే. ఇక వివరాల్లోకి వెళితే యునైటెడ్ స్పిరిట్స్‌లో 53.4 శాతం వాటాను డియాజియో కొనుగోలు చేసేందుకు సిద్దంగా ఉంది. ఈ ఒప్పంద విలువ సుమారు 2 బిలియన్ డాలర్లు. ఈ రెండు సంస్దల మధ్య ఈ ఒప్పందం కుదిరితే ఆర్దిక ఇబ్బందుల్లో సతమతమవుతున్న కింగ్‌ఫిషర్ ఎయిర్ లైన్స్ విమానాలు గాలిలో ఎగిరే అవకాశాలు ఉన్నాయి.

ఈ ఒప్పందంతో యునైటెడ్ స్పిరిట్స్ షేర్లు బాంబే స్టాక్ ఎక్సేంజ్‌లో లాభాల బాటలో ఉన్నాయి. గతంలో ఎన్నడూ లేని విధంగా మధ్యాన్నం 12 గంటల ప్రాంతంలో యునైటెడ్ స్పిరిట్స్ రూ. 1425 వద్ద ట్రేడ్ అయింది. ఈ ఏడాది సెప్టెంబర్‌తో ముగిసిన రెండవ త్రైమాసికానికి (జులై - సెప్టెంబర్)లో రూ. 469 కోట్లుగా ఉన్న కంపెనీ నికర నష్టం 61 శాతం ఎగబాకి రూ. 754 కోట్లకు చేరుకుంది.

లిక్కర్ కింగ్ విజయ్ మాల్యాకు చెందిన ఈ ఎయిర్ లైన్స్ వరుసగా 23వ క్వార్టర్‌లోనూ నష్టాలను చవిచూడడం గమనార్హం. ఆర్థిక ఇబ్బందులు, ఉద్యోగుల సమ్మె, విమాన సర్వీసుల నిలిపివేత, లైసెన్స్ సస్పెన్షన్ వంటి పలు కారణాల వల్ల కంపెనీ నష్టాలు అదుపుతప్పి పెరిగిపోయినట్లు కింగ్‌ఫిషర్ గురువారం ఒక ప్రకటనలో తెలిపింది. త్వరలో బ్యాంకర్లు, డైరెక్టరేట్ జనరల్ ఆఫ్ సివిల్ ఏవియేషన్ (డీజీసీఏ)కు తమ పునరుద్దరణ ప్రణాళికను సమర్పిస్తామని, త్వరలోనే కార్యకలాపాలను పునఃప్రారంభిస్తామని కంపెనీ పేర్కోంది.

తెలుగు వన్ఇండియా