ముంబై: భారత్‌కు చెందిన ఆరవ అతి పెద్ద సాప్ట్‌వేర్ కంపెనీ టెక్ మహీంద్రా 2012 - 2013 ఆర్దిక సంవత్సరం సెప్టెంబర్‌తో ముగిసిన రెండో క్వార్టర్‌లో ఆకర్షణీయ ఫలితాలను సాధించింది. నికర లాభం 46.57 శాతం వృద్ది రేటుతో రూ. 160.13 కోట్లకు చేరుకుంది. గతయేడాది ఇదే జులై - సెప్టెంబర్ క్వార్టర్‌లో రూ. 109 కోట్ల నికర లాభాన్ని మాత్రమే ఆర్జించినట్లు టెక్ మహీంద్రా ఓ ప్రకటనలో తెలిపింది. ఇక కంపెనీ నిర్వహణా ద్వారా వచ్చే ఆదాయం 18.98 శాతం పెరిగి రూ.1,507.87 కోట్లకు పెరగగా.. గత ఏడది ఇదే కాలంలో రూ.1,267.27 కోట్ల ఆదాయంగా నమోదైంది.

జులై - సెప్టెంబర్ త్రైమాసికంలో టెక్ మహీంద్రా కంపెనీ హచిన్‌సన్‌ గ్లోబల్‌ సర్వీసెస్‌ (హెచ్‌జీఎస్‌) 87.1 మిలియన్‌ డాలర్ల పెట్టి కొనుగోలు చేయగా... దీంతో పాటు భారతీ గ్రూప్‌నకు చెందిన కామ్‌వీవా టెక్నాలజీస్‌లో 51 శాతం కంపెనీ వాటాను సొంతం చేసుకుంది. సెప్టెంబర్ చివరికి కంపెనీలో హెచ్‌జీఎస్ సిబ్బందితో మొత్తం 50,479 మంది ఉద్యోగులు విధులను నిర్వర్తిస్తున్నారు. దీనితో పాటు రూ.359 కోట్ల నికర ఆస్తులున్నట్లు ప్రకటన పేర్కొంది. 11,500 మంది సిబ్బందితో యూకే, ఆస్ట్రేలియా, ఐర్లాండ్‌లలో కార్యకలాపాలను కలిగిన హెచ్‌జీఎస్‌ను 8.71 కోట్ల డాలర్లకు టెక్ మహీంద్రా కొనుగోలు చేసిన సంగతి తెలిసిందే.

తెలుగు వన్ఇండియా