న్యూఢిల్లీ: భారతదేశపు అతి పెద్ద ప్రభుత్వ రంగ బ్యాంకింగ్ దిగ్గజం స్టేట్ బ్యాంక్ ఆఫ్ ఇండియా(ఎస్‌బీఐ) జనవరి 1 నుండి కొత్త ప్రమామాలకు అనుగుణంగా ఉండే చెక్కులను మాత్రమే స్వీకరించనున్నట్లు ఓ ప్రకటనలో తెలిపింది. ఇందులో భాగం తమ ఖాతాదారులకు 'సీటీఎస్ - 2010' (చెక్ ట్రంకేషన్ సిస్టమ్) ప్రమాణాలకు అనుగుణంగా ఉన్న చెక్కులను మాత్రమే జారీ చేయాలని తమ శాఖలకు సూచించింది. అంతేకాకుండా సీటీఎస్‌యేతర చెక్కులు డిసెంబర్ 31 తర్వాత నుండి చెల్లుబాటు కావని తమ ఖాతాదారులకు సూచించినట్లు ఎస్‌బీఐ తెలిపింది.

ఎస్‌బీఐ తన పబ్లిక్ నోటీసులో రిజర్వ్ బ్యాంక్ ఆఫ్ ఇండియా ఇచ్చిన ఆదేశాల ప్రకారం ఈ కొత్త ప్రమాణాల చెక్కులను ప్రవేశపెడుతున్నట్లు తెలిపింది. ఈ నేపథ్యంలో తమ ఖాతాదారులంతా తమ తమ బ్యాంకు శాఖల్లో సీటీఎస్‌యేతర చెక్కులను తిరిగి ఇచ్చేసి సీటీసీ - 2010 స్టాండర్డ్ చెక్కులు తీసుకోవాలని సూచించింది. సీటీఎస్ చెక్కులను ఖాతాదారులకు అందించడం వల్ల మోసాలు తగ్గుతాయని, అలాగే క్లియరెన్సు కూడా వేగవంతం అవుతుందని స్టేట్ బ్యాంక్ ఆఫ్ ఇండియా పేర్కొంది.

రిజర్వ్ బ్యాంక్ ఆఫ్ ఇండియా ఆదేశాల ప్రకారం ఇప్పటికే పలు బ్యాంకులు ఈ దిశగా చర్యలు తీసుకుంటున్నాయి. మరింత మంది కస్టమర్లను ఆకర్షించే భాగంలో స్టేట్ బ్యాంక్ ఆఫ్ ఇండియా (ఎస్‌బిఐ) మరో ముందడుగు వేసింది. సేవింగ్స్‌ ఖాతాలపై 'కనీస బ్యాలెన్స్‌' నిబంధనను తొలగిస్తున్నట్టు ప్రకటించింది. గతంలో ఖాతాలో కనీసస్దాయిలో నగదు ఉంచకపోయినా ఎలాంటి పెనాల్టీలు విధించబోమని స్టేట్ బ్యాక్ ఆఫ్ ఇండియా ఒక ప్రకటనలో తెలిపింది.

ఒక విధంగా చెప్పాలంటే సేవింగ్స్ ఖాతాలను జీరో బ్యాలెన్స్ ఖాతాలుగా చేసినట్లేనన్నమాట. ఇప్పటివరకూ బ్యాంకు ఖాతాల్లో కనీస మొత్తంగా 1000 రూపాయలు లేకుంటే రూ 100 వరకు పెనాల్టీ విధించే వారు. అలాగే ఎస్‌బిఐలో కొన్ని ఖాతాలకు కనీసం రూ 50 నగదు ఉంచాల్సి ఉంది.

తెలుగు వన్ఇండియా