సహారా కేసుకు సంబంధించి దాదాపు 3 కోట్ల మంది పెట్టుబడిదారుల వివరాలను సరిచూడడం కోసం ప్రభుత్వ రంగ బ్యాంకులతో పాటు, కేవైసీ రిజిస్ట్రేషన్ ఏజెన్సీల (కేఆర్‌ఏల) సహాయం తీసుకోవాలని మార్కెట్ నియంత్రణ సంస్ద సెబీ నిర్ణయం తీసుకుంది. గతంలో సహారా గ్రూపునకు చెందిన రెండు కంపెనీలు సెబీ నిబంధలను ఉల్లంఘించి ప్రజల వద్ద నుండి సమారు రూ.24,000 కోట్లు డబ్బు వసూలు చేసిన విషయం తెలిసిందే. సుప్రీంకోర్టు కూడా ప్రజలనుంచి వసూలు చేసిన సొమ్మును మూడు నెలల్లో తిరిగి ఇచ్చేయాలని ... దానికి 15 శాతం వడ్డీ కలుపుకుని డిపాజిటర్లకు చెల్లించాలని ఆదేశించింది. ఈ ఆదేశం వెలువడిన వెంటనే సెబీ ప్రయివేట్‌ విచారణ సంస్థలను కూడా రంగంలోకి దింపింది. సుప్రీంకోర్టు ఆగస్టు 31వ తేదీన సహారా గ్రూపు సంస్దలపై తీర్పు ఇచ్చింది.

దస్తావేజు పత్రాలను తనిఖీ చేసిన 30 రోజుల లోపల డబ్బు వాపసుకు రంగం సిద్దం చేయాలని సెబీకి కోర్టు సూచించింది. 30 కోట్ల డాక్యుమెంట్లను పరిశీలించి డిపాజిట్‌దార్లకు తిరిగి డబ్బు అందే విధంగా చర్యలు తీసుకోవాలని సుప్రీంకోర్టు సెబీని ఆదేశించింది. దీంతో సెబీ రిజిష్ట్రార్‌ అండ్‌ ట్రాన్స్‌ఫర్‌ ఏజెంట్‌ (ఆర్‌టీఏ) సహాయం కూడా తీసుకుంది. ఆర్‌బీఐ డిపాజిట్‌దారు డాక్యుమెంట్లు అసలెైనవా లేదా అని పరిశీలించాలి. సహారాలో పెట్టుబడి పెట్టిన వారి సంఖ్య చాలా ఎక్కువగా ఉన్నందు వల్ల సెబీ బ్యాంకులు, కెఆర్‌ఏల సహాయం అభ్యర్థించింది. గతంలోనే సెబీ సహారా యాజమాన్యం ఒత్తిడులకు లొంగరాదని ఇన్వెస్టర్లను కోరింది.

సహారాకుచెందిన రెండు కంపెనీలు సహారా ఇండియా రియల్‌ ఎస్టేట్‌ కార్పొరేషన్‌ లిమిటెడ్‌ (ఎస్‌ఐఆర్‌ఈసీఎల్‌), సహారా హౌజింగ్‌ ఇన్వెస్ట్‌మెంట్‌ కార్పొరేషన్‌ లిమిటెడ్‌ (ఎస్‌హెచ్‌ఐసీఎల్‌) కంపెనీలు సాధారణ ప్రజలను నుంచి సుమారు రూ.24,000 కోట్లు డిపాజిట్లు వసూలు చేశాయి. సహారా గ్రూపు తమ గ్రూపులో పెట్టుబడి పెట్టిన వారి ఈ రెండు కంపెనీల నుంచి పెట్టుబడులను ఉపసంహరించుకుని సహారా గ్రూపునకు చెందిన మరో కంపెనీ అయిన సహారా క్యూ షాప్‌లో పెట్టుబడులు పెట్టాల్సిందిగా ఒత్తిడి చేయడం మొదలు పెట్టింది.

తెలుగు వన్ఇండియా