బెంగుళూరు: దేశీయ సాప్ట్‌వేర్ దిగ్గజం విప్రో ఇన్ఫర్మేషన్ టెక్నాలజీ (ఐటీ) బిజినెస్‌పై మరింత దృష్టిని సారించడానికి ఐటీయేతర వ్యాపారాలను వేరు చేసి ఒక ప్రత్యేక కంపెనీగా ఏర్పాటు చేయాలని నిర్ణయించింది. ఇందుకు విప్రో ఎంటర్‌ప్రైజెస్ పేరుతో కొత్త కంపెనీని స్దాపించింది. ఇది మార్కెట్లో అన్‌లిస్టెడ్ కంపెనీగా ఉంటుంది. దీనిలో భాగంగా కన్సూమర్ కేర్ లైటింగ్(ఫర్నిచర్ విభాగం కూడా), ఇన్‌ఫ్రాస్ట్రక్చర్ ఇంజనీరింగ్ (హైడ్రాలిక్స్, వాటర్ బిజినెస్‌లు), మెడికల్ డయాగ్నస్టిక్ ఉత్పత్తులు, సర్వీసుల బిజినెస్‌లను విప్రో ఎంటర్‌ప్రైజెస్ కింద ఏర్పాటు చేయనుంది. ఈ విభజన 2012, ఏప్రిల్ ఒకటి నుండి అమలులోకి వస్తుంది.

కంపెనీని రెండుగా విడదీయడం వల్ల లాభాల మార్జిన్లు మెరుగుపడతాయని విప్రో సీఎఫ్‌వో సురేష్ సేనాపతి అన్నారు. మొత్తంగా విప్రో మార్జిన్లతో పోలిస్తే ఐటీ బిజినెస్ లాభం గరిష్ట స్థాయిలో ఉంటుందని తెలిపారు. విభజన నేపథ్యంలో యాజమాన్య నిర్వహణలో మార్పులు ఉండవని సేనాపతి చెప్పారు. విప్రో బోర్డు యథాతథంగా కొనసాగుతుందని పేర్కొన్నారు. అజీం ప్రేమ్‌జీ విప్రోకు ఎగ్జిక్యూటివ్ చైర్మన్‌గానే బాధ్యతలు నిర్వర్తిస్తారని పేర్కొన్నారు. అయితే విప్రో ఎంటర్‌ప్రైజెస్‌కు ఆయన నాన్ ఎగ్జిక్యూటివ్ చైర్మన్‌గా వ్యవహరిస్తారని వెల్లడించారు. మొత్తం ఆదాయంలో 90% వాటాను ఆక్రమిస్తున్న ఐటీ సేవలపై మరింత దృష్టిపెట్టేందుకే వ్యాపార విభజనను చేపడుతున్నట్లు చెప్పారు.

100 బిలియన్ డాలర్ల దేశీయ ఐటీ పరిశ్రమలో టీసీఎస్, ఇన్ఫోసిస్, ఐబీఎం, యాక్సెంచర్ వంటి దిగ్గజాలతో పోటీపడుతున్నామని పేర్కొన్నారు. దీనిలో భాగంగా భవిష్యత్‌లో ఐటీ సేవలపై మరింత దృష్టిని కేంద్రీకరించనున్నట్లు చెప్పారు. మార్కెట్ల నియంత్రణ సంస్థ సెబీ నిబంధనల ప్రకారం 2013 మే నెల కల్లా లిస్టెడ్ కంపెనీలో ప్రమోటర్ల వాటా 75%కు మించరాదు. ప్రస్తుతం విప్రోలో ప్రమోటర్ల వాటా 78.3%గా ఉంది. విప్రో ఎంటర్‌ప్రైజెస్ ఏర్పాటు తరువాత ఈ వాటా 75.7%కు దిగి వస్తుందని చెబుతున్నారు.

ఈ పునర్‌వ్యవస్దీకరణ పధకంలో భాగంగా దేశీయ వాటాదారులకు మూడు ఐచ్చికాలు ఉండోచ్చు. వాటాదారుల వద్ద ఉన్న రూ. 2 ముఖ విలువ కలిగిన ప్రతి ఐదు విప్రో షేర్లకు రూ.10 ముఖ విలువ కలిగిన ఒక విప్రో ఎంటర్‌ప్రైజెస్ షేరు లభిస్తుంది. రెండో ఐచ్చికంలో విప్రో వాటాదారులు వారి వద్ద ఉన్న ప్రతి 5 షేర్లకు రూ.50 ముఖ విలువ కలిగిన ఒక రిడీముబల్ ప్రిఫరెన్స్ షేరు పొందవచ్చు. మూడో ఆఫ్షన్లో విప్రో ఎంటర్‌ప్రైజెస్‌లో లభించే షేర్లకు బదులు ప్రమోటర్ల నుండి విప్రో షేర్లనే పొందవచ్చు. విప్రో లైటింగ్ ఉత్పత్తులతోపాటు సంతూర్, షికాకాయ్, చంద్రిక, బేబీ సాఫ్ట్, సన్‌ఫ్లవర్ వనస్పతి, గ్లూకోవిటా, యార్డ్‌లీ బ్రాండ్లు విప్రో ఎంటర్‌ప్రైజెస్లలో ఉన్నాయి.

ఐటీయేతర వ్యాపారాలను వేరు చేయడం వల్ల వాటాదారులకు లభించే విలువ పెరుగుతుందని నేను విశ్వసిస్తున్నాను. రెండు కంపెనీలపైనా ప్రత్యేక దృష్టి పెట్టడం ద్వారా ఇకపై మరింత అభివృద్దిని అందుకుంటామని విప్రో ఎగ్జిక్యూటివ్ చైర్మన్ అజీం ప్రేమ్‌జీ అన్నారు.

తెలుగు వన్ఇండియా