న్యూయార్క్: హరికేన్ శాండీ కారణంగా అమెరికా స్టాక్ మార్కెట్లు రెండో రోజు కూడా మూతపడ్డాయి. దీంతో యూరప్ మార్కెట్లు నష్టాలతో ప్రారంభమయ్యాయి. ప్రాన్స్ సూచీ 0.77 శాతం, జర్మనీ సూచీ 0.4 శాతం, బ్రిటన్ సూచీ 0.2 శాతం నష్టపోయాయి. ఇక ఈ ఈరోజు ఉదయం ఆసియా మార్కెట్లు లాభాల్లో ప్రారంభమైనప్పటికీ.. రిజర్వ్ బ్యాంక్ ఆఫ్ ఇండియా రెపోరేటుని యధావిధిగా ఉంచడంతో ఉదయం 11 గంటల ప్రాంతంలో నష్టాలతో కొనసాగుతున్నాయి. బాంబే స్టాక్ ఎక్సేంజ్ 152 పాయింట్ల వరకూ నష్టపోతూ 18,483కి సమీపంలో ట్రేడవుతోంది. అదే విధంగా నిప్టీ 40 పాయింట్లకు పైగా నష్టపోతూ 5,625 సమీపంలో ట్రేడవుతోంది.

తైవాన్‌ సూచీ 1 శాతానికి పైగా లాభంలో ఉంది. సింగపూర్‌ నిఫ్టీ 20 పాయింట్ల దాకా కోల్పోతూ 5,680 పాయింట్లకు సమీపంలో ట్రేడవుతోంది. అధిక వడ్డీ రేట్లు కారణంగా కంపెనీల ఆదాయాలు తగ్గిపోతున్నాయి. జీడీపీ వృద్ది రేటు పడిపోతోంది. ఐతే ద్రవ్యోల్బణం 8 శాతానికి దగ్గర్లో ఉండడం వల్ల రిజర్వ్ బ్యాంక్ ఆఫ్ ఇండియా వడ్డీ రేట్లను తగ్గించడం లేదు. ఆర్దిక లోటు ఎక్కువగా ఉండటం కూడా రిజర్వ్ బ్యాంక్‌ను ఆందోళనకు గురి చేస్తోంది. ఈ నేపధ్యంలో ఆర్దిక మంత్రి చిదంబరం 5 సంవత్సరాల రోడ్డు మ్యాప్‌ను ప్రకటించారు.

ఈరోజు జరిగిన రిజర్వ్ బ్యాంక్ పరపతి విధాన సమీక్షను రిజర్వ్ బ్యాంక్ గవర్నర్ దువ్వూరి సుబ్బారావు ప్రకటించారు. రెపోరేటు యధాతధంగా ఉంచినట్లు తెలిపారు. నగదు నిల్వలు నిష్పత్తిని పావు శాతం మేరకు తగ్గించినట్లు తెలిపారు. ఈ నిర్ణయంతో బ్యాంకులకు రూ. 17,500 కోట్ల మేర నగదు నిల్వలు సమకూరనున్నాయి.

తెలుగు వన్ఇండియా