గ్రేటర్ నోయిడా: ఆర్దిక ఇబ్బందులతో సతమతమవుతున్న కింగ్‌ఫిషర్ ఎయిర్ లైన్స్‌ను కొనసాగించేందుకు లాభాల్లో ఉన్న తమ కంపెనీకి చెందిన యూబి గ్రూప్ వాటాలను అమ్మే ప్రసక్తే లేదని ఆ సంస్ద ఛైర్మన్ విజయ్ మాల్యా స్పష్టం చేశారు. వీటితో పాటు జానీ వాకర్, స్మర్న్ ఆఫ్ వోడ్కా లాంటి బ్రాండ్లను తయారు చేస్తున్న ఇంగ్లాండ్‌కు చెందిన కంపెనీ డియాజియోతో యూబి గ్రూప్ ఎటువంటి ఒప్పందం కుదుర్చుకోలేదని అన్నారు. కింగ్ ఫిషర్ కోసం ఈ ఏడాది ఏప్రిల్ నుండి 24 కోట్ల డాలర్లు పెట్టుబడులు పెట్టామని, యూబి గ్రూప్ ఆస్తులు అమ్మి అందులో ఇన్వెస్ట్ చేసే యోచనలేదని అన్నారు.

తనకు, తన కుటుంబ సంపదకు, వాటాదారులకు ఏది మంచిదైతే అదే చేస్తానని అన్నారు. కింగ్‌ఫిషర్ ఎయిర్ లైన్స్‌ను ఆర్దిక ఇబ్బందుల నుండి తప్పించడానికి లాభాల్లో నడుస్తున్న తమ కంపెనీల్లో వాటాలను బలవంతగా విక్రయించనున్నారని మీడియాలో వస్తున్న వార్తలపై ఆయన తీవ్రంగా మండిపడ్డారు. కింగ్‌ఫిషర్ ఎయిర్ లైన్స్ సమస్య త్వరలోనే పరిష్కారం అవుతుందని, ఆ కంపెనీ మరలా నిలదొక్కుకోవాలని కోరుకుంటున్నానని ఆయన అన్నారు. కింగ్‌ఫిషర్ ఎయిర్ లైన్స్‌కు నిధులందించే సత్తా తన యూబి గ్రూప్‌నకు ఉందని తెలిపారు.

ప్రస్తుతం ఇంధనం ధరలు అధికంగా ఉండడం, అధిక పన్నులు, విదేశీ పెట్టుబడులకు అనుమతి లేకపోవడం ఇలా ఎన్నో విభిన్న కారణాల వల్ల భారత ఏవియేషన్ రంగం ఆకర్షణీయంగా లేదని అన్నారు. కింగ్‌ఫిషర్ ఎయిర్ లైన్స్‌కు తగిన బాగస్వామి కోసం చర్చలు జరుగుతున్నాయని అన్నారు. ఇది ఆరు వారాల్లో తేలేది కాదని, కనీసం ఆరు నెలలు పడుతుందని పేర్కోన్నారు. ప్రపంచంలో ఉన్న ధనవంతుల జాబితాలో బిలియనీర్ ట్యాగ్ పోయినందుకు ఆనందంగా ఉందని అన్నారు.

తెలుగు వన్ఇండియా