ముంబై: ఆర్దిక ఇబ్బందుల్లో కూరుకుపోయి, లైసెన్స్ రద్దుకు గురైన కింగ్‌ఫిషర్ ఎయిర్‌లైన్స్‌పై బ్యాంకర్లలో ఆందోళన వ్యక్తమవుతుంది. ఐతే కింగ్‌ఫిషర్ ఎయిర్‌లైన్స్ నుంచి తమ రుణ బకాయిలు రాబట్టుకునేందుకు రికవరీ చర్యలే చివరి మార్గమని ఆ సంస్థకు రుణాలిచ్చిన బ్యాంకులు తెలిపాయి. కింగ్‌ఫిషర్‌కు 17 బ్యాంకులు కలిపి మొత్తం 7,500 కోట్ల రుణాలిచ్చాయి. ఆర్దిక ఇబ్బందులతో సతమతమవుతూ కింగ్‌ఫిషర్ తాజాగా అక్టోబర్ 23 వరకూ లాకౌట్‌ను ప్రకటించిన విషయం తెలిసిందే. దీంతో ఉద్యోగులకు జీతాలు ఇవ్వకపోవడంతో విమానయాన నియంత్రణ సంస్ద డైరెక్టరేట్ ఆఫ్ సివిల్ ఏవియేషన్ (డీసీజీఏ) శనివారం కింగ్ ఫిషర్ ఎయిర్ లైన్స్ లైసెన్స్ను రద్దు చేసిన విషయం తెలిసిందే.

తమకు హామీగా వుంచిన ఆస్తుల ద్వారా రుణ బకాయిల్లో గరిష్ఠంగా 10-15% మాత్రమే రాబట్టుకోగలమని, అందువల్ల రికవరీ చర్యలే ఇక చివరి మార్గమని భావిస్తున్నామని ముంబయికి చెందిన ఓ ప్రభుత్వరంగ బ్యాంక్ సీనియర్ అధికారి చెప్పారు. ఈ బ్యాంక్ కింగ్‌ఫిషర్‌కు రూ.500 కోట్ల దాకా రుణాలు ఇచ్చింది. దీంతో కింగ్‌ఫిషర్ ఎయిర్‌లైన్స్ మళ్లీ తిరిగి కార్యకలాపాలు ప్రారంభించి, మా రుణాలను చెల్లించాలని మేం కోరుకుంటున్నాం అన్నారు. పూర్తిగా కంపెనీ మూతబడనంత వరకూ పరిస్దితుల్లో పెద్దగా మార్పులేవీ ఉండవు. కంపెనీ పూర్తిగా మూతబడితే రికవరీ చర్యలపై దృష్టిపెడతామని ఎస్‌బీఐ ఎండీ(మిడ్-కార్పోరేట్స్) ఎస్. విశ్వనాథన్ పేర్కోన్నారు. బ్యాంకుల కన్సార్టియానికి నేతృత్వం వహిస్తున్న ఎస్‌బీఐ కింగ్‌ఫిషర్‌కు రూ. 1,500 కోట్ల వరకు రుణ సహాయం చేసింది.

కింగ్‌ఫిషర్ బ్యాంకర్ల నుండి డబ్బు పొందేందుకు గాను గోవాలో కింగ్‌ఫిషర్ విల్లా, ముంబైలోని కింగ్‌ఫిషర్ హౌస్‌లను కొలేటరల్‌గా తనఖా పెట్టింది. వీటిని విక్రయించేందుకు వీలుగా మదింపు చేపట్టడం కోసం బ్యాంకర్లు జులైలో హెచ్‌డీఎఫ్‌సీ సెక్యూరిటీస్‌ను నియమించుకున్న విషయం తెలిసిందే. మార్గెట్ వర్గాల ప్రకారం ఈ రెండు ఆస్తులను అమ్మితే గరిష్టంగా రూ. 180 కోట్లు మాత్రమే వస్తుందని అంచనా.

తెలుగు వన్ఇండియా