డెక్కన్ ఛార్జర్స్ రద్దుపై సవాల్ చేస్తూ సుప్రీం కోర్టుని ఆశ్రయించిన డీసీహెచ్‌ఎల్

న్యూఢిల్లీ: భారత క్రికెట్ నియంత్రణ మండలి(బిసిసిఐ), డెక్కన్ ఛార్జర్స్ ప్రాంఛైజీ మధ్య వివాదం బాంబై హైకోర్టు నుండి న్యూఢిల్లీలోని అత్యున్నత న్యాయస్దానం సుప్రీం కోర్టుకి చేరింది. బిసిసిఐ బోర్డు తీసుకున్న ప్రాంఛైజీ రద్దు నిర్ణయాన్ని సవాల్ చేస్తూ డెక్కన్ క్రానికల్ హోల్డింగ్స్ లిమిటెడ్ సుప్రీం కోర్టుని ఆశ్రయించింది. ప్రాంఛైజీని రద్దు చేస్తూ బిసిసిఐ తీసుకున్న నిర్ణయంపై స్టే విధించాలనన్న డెక్కన్ క్రానికల్ హోల్టింగ్స్ లిమిటెడ్(డీసీహెచ్‌ఎల్) పిటిషన్‌ను నిన్న(గురువారం) బాంబే హైకోర్టు తిరస్కరించిన విషయం తెలిసిందే. డెక్కన్ ఛార్జర్స్ రద్దుపై ఆర్బిట్రేటర్ ఇచ్చిన స్టేటస్ కో ఆర్డర్‌ను బాంబై హైకోర్టు కొట్టి వేయడంతో పాటు బోర్డు నిర్ణయాన్ని కూడా సమర్దించింది. దీంతో డెక్కన్ క్రానికల్ హోల్టింగ్స్ లిమిటెడ్(డీసీహెచ్‌ఎల్) సుప్రీం కోర్టుని ఆశ్రయించింది.

ఈ నెల 13న ఆర్బిట్రేటర్ స్టేటస్ కో ఇచ్చిన ఆదేశాలను బిసిసిఐ సవాల్ చేయగా.. హైకోర్టు తోసిపుచ్చడంతో డెక్కన్ ఛార్జర్స్ రద్దు అమల్లోనే ఉన్నట్లైంది. ఐతే ప్రాంఛైజీని రద్దు చేస్తూ బిసిసిఐ తీసుకున్న నిర్ణయంలో చట్టబద్దత, దాని కాలపరిమితిని ఆర్బిట్రేటర్ నిర్ణయించవచ్చని బాంబై హైకోర్టు తెలిపింది. అక్టోబర్ 1న హైకోర్టు ఇచ్చిన ఆదేశాల ప్రకారం రూ. 100 కోట్ల బ్యాంకు గ్యారంటీ సమర్ఫణకు డీసీహెచ్‌ ఎల్ గడువును(అక్టోబర్ 12న) పొడిగించడానికి బాంబై హైకోర్టు అంగీకరించ లేదు. అక్టోబర్ 12న స్టేటస్ కో విధించే అధికారం ఆర్బిట్రేటర్‌ లేదంటూ జస్టిస్ ధనూకా తెలిపారు.

ఆర్బిట్రేటర్ హైకోర్టు కంటే ఉన్నతమైనది కాదు. కాబట్టి హైకోర్టు ఇచ్చిన ఆదేశాలనే ధిక్కరించేలా ఆయన ఉత్తర్వులు జారీ చేశారు. ఒకసారి హైకోర్టు తిరస్కరించిన తర్వాత అదే విషయాలను ఆర్బిట్రేటర్ ముందు ఉంచిన పిటిషన్‌ను తప్పుబట్టారు. అక్టోబర్ 1న బ్యాంకు గ్యారంటీని సమర్పించాలని ఆదేశించిన మరో న్యాయమూర్తి ఉత్తర్వులు, డీసీహెచ్‌ఎల్, బిసిసిఐ సంస్దల ప్రయోజనాలను కాపాడే విధంగా తీసుకున్న నిర్ణయమని అన్నారు. గడువు తీరిన తర్వాత కూడా డీసీహెచ్‌ఎల్ బ్యాంకు గ్యారంటీని సమర్పించలేదు కాబట్టి ఆ సంస్దకు ఉపశమనం కలిగించాల్సిన అవసరం లేదని అన్నారు.

ఇది ఇలావుండగా, 2008లో హైదరాబాద్ ఫ్రాంచైజీని రూ.428 కోట్లకు కొనుగోలు చేసిన డీసీహెచ్‌ఎల్... కొంతకాలంగా తమ ఆటగాళ్లు, కోచ్‌లకు బకాయిలు చెల్లించకపోవడంతో వివాదం ప్రారంభమైంది. ఆ వివాదం కాస్తా డెక్కన్ చార్జర్స్‌ను రద్దు చేసే వరకూ వెళ్లింది.

తెలుగు వన్ఇండియా